Namangandagi avtomobillarga gaz to‘ldirish shoxobchalarida narxlar pasayishi kuzatilmoqda. Bu haqda “Daryo” muxbiri Azizbek Abduvaliyev xabar bermoqda.
Bu boradagi ovozalarga ishonch hosil qilish uchun bugun, 14-sentabr kuni tongda Namangan shahrining “Go‘zal” dahasidagi shoxobchalardan biriga borganimizda 2700 so‘mdan metan gaz quyilayotganiga guvoh bo‘lgandik.
Tush paytiga kelib, viloyatdagi shoxobchalarda chindan ham narxlar pasayishni boshlaganini tasdiqlovchi ma’lumotlar kelishni boshladi.
Shu paytgacha viloyatdagi avtomobillarga metan gaz to‘ldirish shoxobchalarida o‘rtacha narx 2800 so‘mni tashkil etgan bo‘lsa, hozirga kelib 15 dan ortiq shoxobchada bu ko‘rsatkich 2600 so‘mgacha pasaygan.
Ma’lumot uchun, bugungi kunda Namangan shahrida 27 ta, viloyat bo‘yicha esa jami 115 ta avtomobillarga gaz to‘ldirish kompressor shoxobchasi faoliyat ko‘rsatmoqda.
Izoh (0)