KXDR o‘zini yadro davlati deb e’lon qildi

Shimoliy Koreya unga yadro davlati maqomini beruvchi qonunni qabul qildi, deb yozadi “Kommersant”. Bu respublikaga unga hujum qilgan taqdirda dushmanga yadro zarbasi berish imkoniyatini taqdim etadi. KXDR yetakchisi Kim Chen In Koreya yarim orolini yadrodan xoli qilish bo‘yicha muzokaralardan bosh tortdi.

Yadro kuchlari siyosatini yuridik jihatdan mustahkamlab qo‘yish qarori haqida Kim Chen In 7-sentabr kuni Oliy xalq majlisi yig‘ilishida e’lon qildi. Tasdiqlangan hujjat “Yadro quroliga nisbatan siyosat” deb nom oldi. Unda aytilishicha, Shimoliy Koreyaning bunday quroldan foydalanish bo‘yicha siyosati “hujumkor hisoblanadi”.

“Agar dushman hujumi tufayli, davlat yadro kuchlarini boshqarish tizimi xavf ostida qolsa, dushman kuchlarini, shu jumladan, provokatsiya manbasi va qo‘mondonlik punktini yo‘q qilish maqsadidagi yadro zarbasi oldindan aniqlashtirib olingan reja bo‘yicha avtomatik tarzda va zudlik bilan beriladi”, — deyiladi hujjatda.

Shuningdek, Kim Chen Inga hujum bo‘lgan taqdirda ham yadro zarbasi berilishi mumkin. Shu bilan birga ta’kidlanishicha, yadro quroli ”tashqi tajovuzga qarshi so‘nggi chora sifatida foydalaniladi”, va Shimoliy Koreya uni birinchi bo‘lib qo‘llamaydi. Respublika yadro qurolini boshqa mamlakatlar hududlariga joylashtirmaslik va ularga yadro quroli bilan bog‘liq texnologiyalar, obyektlar yoki materiallarni bermaslik majburiyatini oladi.

KXDR yetakchisi respublika hech qachon yadro qurolidan voz kechmasligini ma’lum qildi. Kim Chen In da’vo qilishicha, AQSH KXDRni “o‘z yadroviy energiyasidan va o‘z-o‘zini mudofaa qilish huquqidan voz kechish”ga undab, “Shimoliy Koreya rejimini qulatish” maqsadini o‘z oldiga qo‘ymoqda. Uning ta’kidlashicha, Shimoliy Koreya “hech qachon, hatto yuz yil davomida sanksiyalar kiritilsa ham, taslim bo‘lmaydi”.

2021-yilda KXDR yadro dasturiga 640 million dollardan ortiq mablag‘ sarfladi. 2022-yil boshidan buyon Shimoliy Koreya 17 marta raketa uchirdi, oxirgi raketa parvozi mayda amalga oshirilgandi. AQSH hukumati avgustda KXDR yettinchi marta yadro quroli sinovini amalga oshirishni rejalashtirayotgani haqida ogohlantirdi. O‘sha oyda Janubiy Koreya prezidenti Yun Sok Yol KXDRga denuklearizatsiya evaziga iqtisodiy ko‘mak taklif qildi. Shimoliy Koreya hukumati bu taklifni rad etib, uni “safsata” deb atadi.