Estoniya, Latviya, Litva va Polsha 19-sentabrdan Shengen sayyohlik vizalari bo‘lgan rossiyaliklar uchun o‘z chegaralarini yopadi

Estoniya 19-sentabrdan boshlab, har qanday davlat tomonidan berilgan Shengen vizasi bo‘lgan rossiyalik sayyohlar uchun o‘z chegaralarini yopadi. Bu haqda mamlakat tashqi ishlar vaziri Urmas Reynsalu ma’lum qildi, deb yozadi Meduza.

“19-sentabrga o‘tar kechasi Rossiya fuqarolari uchun Estoniyaga kirishga taqiq kuchga kiradi. Bu Estoniyada berilgan vizalarga, shuningdek, Yevroittifoqning boshqa mamlakatlaridan olingan vizalarga ega rossiyaliklarga taalluqli”, — dedi Estoniya TIV rahbari.

Reynsaluning qayd etishicha, xuddi shunday choralarni Latviya, Litva va Polsha ham qo‘llaydi.

Shu bilan birga, taqiq qarindoshlarini ko‘rishga borayotganlar hamda gumanitar sabablarga ko‘ra kelmoqchi bo‘lganlar uchun amal qilmaydi.

Polsha va Boltiq mamlakatlari rossiyalik sayyohlar uchun Yevroittifoqqa kirishni to‘liq taqiqlashni yoqlab chiqdi, ammo bu qaror boshqa mamlakatlar tomonidan qo‘llab-quvvatlanmadi. Buning o‘rniga, Yevroittifoq Rossiya bilan soddalashtirilgan tartibda vizalar berish haqidagi kelishuvni to‘xtatib qo‘yishga qaror qildi.

Shengen bitimi uning tarkibiga kiruvchi davlatlarning butun hududi bo‘ylab erkin ko‘chib yurishni kafolatlaydi. Ayni vaqtda Yevroittifoqning tashqi chegaralari orqali kirish masalalarini har bir mamlakat mustaqil nazorat qiladi.

Rossiya bilan chegaradosh bo‘lgan Finlyandiya o‘z hududiga kirishni taqiqlash g‘oyasiga qo‘shilmadi. Mamlakat hukumati bunday qarorlar Yevroittifoq darajasida qabul qilinishi kerak, degan fikrni bildirdi. Shu bilan birga, Finlyandiya berilayotgan vizalar sonini sezilarli darajada qisqartirdi.

Avvalroq Latviya, Litva va Estoniya Shengen vizasiga ega Rossiya va Belarus fuqarolari uchun quruqlik chegaralarini kesib o‘tishni sezilarli darajada cheklashga kelishib olgan edi.

Shuningdek, rossiyaliklarning Gruziya hududiga kirishi ommaviy ravishda taqiqlana boshladi.