Ijtimoiy tarmoqlarda Andijon viloyatining Paxtaobod tumanidagi 38-maktabda maktab direktori o‘quvchilarga sinfxonaga oyoqyalang kirishni talab qilgani, muassasada ta’mirlash ishlari olib borilganligi sababli “domashniy” oyoq kiyim olib kelish buyurilgani ma’lum qilingan. Shuningdek, bunday tartibdan ota-onalar norozi ekanligi ta’kidlangan.
Viloyat xalq ta’limi boshqarmasi ushbu holatga munosabat bildirib, maktab rahbariyati binoni toza va ozoda saqlash maqsadida maxsus oyoq kiyim kiyish tajribasini ilgari surayotganini, holat ijtimoiy tarmoqlarda keng muhokamalarga sabab bo‘lgani uchun holatga yo‘l qo‘ygan maktab direktori O.X. hamda direktor o‘rinbosari M.B.ga intizomiy chora qo‘llanilganini ma’lum qildi.
“Daryo” muxbiri mazkur holatni kengroq o‘rganish maqsadida ushbu muassasada bo‘lib, maktab o‘qituvchilari, o‘quvchilar va ularning ota-onalari bilan suhbatlashdi.
O‘tgan yili maktabimiz bunaqa ta‘mir bo‘lmagan edi, shu sababli hamma ko‘chadan kiyib kelgan oyoq kiyimi bilan sinfxonalarga kirib kelardi. Bu yil maktabimiz o‘zgardi, judayam chiroyli bo‘ldi. Endigi tartib qoidamizga ko‘ra, ko‘chadan kiyib kelgan oyoq kiyimni maktabning ichida kiymaslik talab qilinmoqda. Bularning barchasi ota-onalarimiz, o‘qituvchilarimiz, sinf rahbarlarimiz bilan kelishgan holda bo‘ldi. Shu kunga qadar hech kimga bosim o‘tkazilmagan. Biz maktabga kelib, sinfxonamizga kirib, yumshoq oyoq kiyimlarimizda darsda o‘tiribmiz. Bu bizga judayam qulay”, — deydi Anziratoy Mahmudova.
Uzoq yillardan buyon ushbu maktabda ishlab kelayotgan o‘qituvchi Opiyatxon Nazarovaning aytishicha, sinflarda o‘quvchilar uchun barcha imkoniyat yaratib berilgan.
Maktabimiz rahbariyati, ustozlari — barchamiz maslahat bilan yangi o‘quv yilini juda katta ishtiyoq bilan boshlaganmiz. Mana shu video tarqalgandan keyin biz hammamiz hayron bo‘ldik. Chunki maktabimizda bunday holat yuzaga kelgani yo‘q, aytarli darajada emas. Lekin haqiqatan ham o‘quvchilarga sinf xonalarida shunday imkoniyatlar yaratib berilgan”, — deydi Opiyatxon Nazarova.
Farzandlarimni yalangoyoq yurishlariga shaxsan men ruxsat bermayman. Aytingchi, 10-sinf, voyaga yetayotgan qiz mana shu kafelda yalangoyoq yuradimi? Ayniqsa, ertalabki soat 08:00 da. Sizlar yura olasizlarmi shu sovuqda? Hozir 1-sinfda o‘qiydigan bolam shu yerda bir kun yalangoyoq yurgani uchun shamollab uyda yotibdi. O‘sha kuni direktor bolalarga baqiribdi. Qaysidir ota-ona kelib bunday qilishga haqi yo‘qligini aytib, urishibdi ham. Lekin u kuni o‘zim yo‘q edim. Hozir videolarni Facebook’dan ko‘rdim. Qizimning sinf rahbari ham baqirib so‘kkan. Menimcha, ularning bunday qilishga haqqi yo‘q”, — deydi Shahnoza O‘rinboyeva.
Nabirasini olib ketish uchun kelgan Zumradxon Vahobova nabiralari shunday chiroyli maktabda o‘qiyotganidan quvonayotganini, ijtimoiy tarmoqlarda tarqalgan xabarlarni eshitib hayron qolganini bildirmoqda.
Sharifaxon Ahtamovaning aytishicha, u ushbu maktabda 27 yildan ortiq o‘quvchilarga ta’lim-tarbiya bergan. Uning aytishicha, maktabda muhit juda og‘ir, o‘qituvchilar guruhbozlikka bo‘linib qolgan. Maktab direktori ularni birlashtirishga harakat qilsa-da ayrimlar bo‘ysunishni istashmayapti.
Shu mahallada yashayman. 27 yildan ortiq vaqt mana shu maktabda ishlaganman. Farzandlarim ham shu yerni tamomlagan. Bu maktabdagi ichki muhit o‘ta og‘irligi, besaranjomligi, haqiqatning yo‘qligini ko‘rish mumkin. O‘qituvchilar o‘rtasida guruhlar mavjud. Ayrim o‘qituvchilar shu guruhlarga qo‘shilib olib, nohaqlik qilib halol ishlashga yo‘l qo‘yishmayapti. Tarbiya maskanida ishlayotganini sezmaydigan ayrim kimsalar, muhitni buzmoqda. Maktab direktori ushbu maktabda faoliyat olib borayotganiga ko‘p bo‘lmasa-da, maktabni shu darajaga yetkazdi. Og‘ir mehnat qildi. Lekin bu jamoani bir tomonga yo‘llasa, ularni boshqa tomonga yetaklaydigan ayrim g‘alamis, tarbiya maskanida ishlashga noloyiq orqaga tortishga urinmoqda.Kechagi holat esa direktor tomonidan mavjud tartib qoidalarga qo‘shimcha tarzda bir yangilik edi, xolos. Bolalar sinf xonalarida yumshoq oyoq kiyimlarida yuradi. Buning nimasi yomon?! Axir bu yerda qo‘rqinchli, achinarli holat bo‘lmadi. Ayrim ota-onalar bunga loqaydlik bilan qaradi va yaxshilikka nisbatan shunday javob berishdi”, — deydi Sharifaxon Ahtamova.
Maktab ochilayotgan kuni ota-onalar tomonidan shunday fikr aytilgan, barchaning tashabbusi bilan yo‘lga qo‘yilgan tartib edi. Maqsad shu binoni uzoqroq saqlab qolish, parokanda qilmaslik. Yevropada 30 yillar avval muzeylarga va boshqa binolarga shohu gado oyoq kiymlarini almashtirib kirgan”, — deydi mahalla faoli Abdumannop Hamidov.Maktab direktori o‘rinbosari Surayyo Soliyevaning ma’lum qilishicha, tarmoqda e’tirozlarga sabab bo‘layotgan tartibni joriy qilish taklifi ota-onalar tomonidan bildirilgan. Uzoq muhokamalar va ko‘pchilikning roziligi bilan joriy qilingan.
Bu tartib ota-onalar bilan kelishilgan holda bo‘lgan. Aslida bu fikr bizdan chiqmagan. Ota-onalar shu fikrni bildirgan. Shundan keyin biz buni maktab ma’muriyati va mahalla faollari bilan muhokama qildik. Uzoq o‘ylab ko‘rgach, shu tartib-qoidani joriy qildik. Ya’ni o‘quvchilar keladi, sinf xonasining eshigi tagida oyoq kiyimlarini almashtiradi. Bunga hamma rozi bo‘lgandi. Hozir kunlar issiq, ertaga sovuq kunlar boshlanganda bu tartib bolalar uchun ancha foydali. Ular yomg‘irli havoda, loy ko‘chalarni bosib kelsa oyoq kiyimlari namlanishi, sovuq o‘tishi mumkin. Shunda ular sinf xonalariga kirishdan oldin yumshoq yengil poyabzallarini kiyib oladi. Biz o‘z istaklarimiz bilan emas, ota-onalarning roziligi bilan shu tartibni amalga oshirganmiz”, — deydi Surayyo Soliyeva.
“Daryo” muxbiri maktab direktorining izohini bilish maqsadida u bilan telefon orqali bog‘lanishga ham urindi. Qo‘ng‘iroqlarga javob berishni istamagan direktor sms-xabarnoma orqali o‘quvchining oyoq kiyimini uning oyog‘idan tortib yechmaganini, yalangoyoq kirishga majburlamaganini, bo‘lib o‘tgan ishlar uyushtirilganini shu sababli boshqa savollarga javob berishni istamaganini bildirgan.
“Daryo” voqealar rivojini kuzatishda davom etadi.
Izoh (0)