Ижтимоий тармоқларда Андижон вилоятининг Пахтаобод туманидаги 38-мактабда мактаб директори ўқувчиларга синфхонага оёқяланг киришни талаб қилгани, муассасада таъмирлаш ишлари олиб борилганлиги сабабли «домашний» оёқ кийим олиб келиш буюрилгани маълум қилинган. Шунингдек, бундай тартибдан ота-оналар норози эканлиги таъкидланган.
Вилоят халқ таълими бошқармаси ушбу ҳолатга муносабат билдириб, мактаб раҳбарияти бинони тоза ва озода сақлаш мақсадида махсус оёқ кийим кийиш тажрибасини илгари сураётганини, ҳолат ижтимоий тармоқларда кенг муҳокамаларга сабаб бўлгани учун ҳолатга йўл қўйган мактаб директори О.Х. ҳамда директор ўринбосари М.Б.га интизомий чора қўлланилганини маълум қилди.
«Дарё» мухбири мазкур ҳолатни кенгроқ ўрганиш мақсадида ушбу муассасада бўлиб, мактаб ўқитувчилари, ўқувчилар ва уларнинг ота-оналари билан суҳбатлашди.
Юқори синф ўқувчилари Анзиратой Маҳмудова ҳамда Хушноза Манноповаларнинг айтишича, бу тартиб қоидага ота-оналар рози бўлган, барча ўқувчиларга маъқул келган.Ўтган йили мактабимиз бунақа таъмир бўлмаган эди, шу сабабли ҳамма кўчадан кийиб келган оёқ кийими билан синфхоналарга кириб келарди. Бу йил мактабимиз ўзгарди, жудаям чиройли бўлди. Эндиги тартиб қоидамизга кўра, кўчадан кийиб келган оёқ кийимни мактабнинг ичида киймаслик талаб қилинмоқда. Буларнинг барчаси ота-оналаримиз, ўқитувчиларимиз, синф раҳбарларимиз билан келишган ҳолда бўлди. Шу кунга қадар ҳеч кимга босим ўтказилмаган. Биз мактабга келиб, синфхонамизга кириб, юмшоқ оёқ кийимларимизда дарсда ўтирибмиз. Бу бизга жудаям қулай», — дейди Анзиратой Маҳмудова.
Узоқ йиллардан буён ушбу мактабда ишлаб келаётган ўқитувчи Опиятхон Назарованинг айтишича, синфларда ўқувчилар учун барча имконият яратиб берилган.
Мактабимиз раҳбарияти, устозлари — барчамиз маслаҳат билан янги ўқув йилини жуда катта иштиёқ билан бошлаганмиз. Мана шу видео тарқалгандан кейин биз ҳаммамиз ҳайрон бўлдик. Чунки мактабимизда бундай ҳолат юзага келгани йўқ, айтарли даражада эмас. Лекин ҳақиқатан ҳам ўқувчиларга синф хоналарида шундай имкониятлар яратиб берилган», — дейди Опиятхон Назарова.Тасвирга олиш жараёнида ўзини Шаҳноза Ўринбоева дея таништирган аёл бир неча йил аввал ушбу мактабда дарс берганини, синф раҳбарлик қилганини айтиб, мактабда жорий этилган тартиб юзасидан фикрлари борлигини билдирди. Унинг таъкидлашича, биринчи синфда ўқиётган фарзанди бир куни ялангоёқ юргани учун шамоллаб қолган.
Фарзандларимни ялангоёқ юришларига шахсан мен рухсат бермайман. Айтингчи, 10-синф, вояга етаётган қиз мана шу кафелда ялангоёқ юрадими? Айниқса, эрталабки соат 08:00 да. Сизлар юра оласизларми шу совуқда? Ҳозир 1-синфда ўқийдиган болам шу ерда бир кун ялангоёқ юргани учун шамоллаб уйда ётибди. Ўша куни директор болаларга бақирибди. Қайсидир ота-она келиб бундай қилишга ҳақи йўқлигини айтиб, уришибди ҳам. Лекин у куни ўзим йўқ эдим. Ҳозир видеоларни Facebook’дан кўрдим. Қизимнинг синф раҳбари ҳам бақириб сўккан. Менимча, уларнинг бундай қилишга ҳаққи йўқ», — дейди Шаҳноза Ўринбоева.
Набирасини олиб кетиш учун келган Зумрадхон Ваҳобова набиралари шундай чиройли мактабда ўқиётганидан қувонаётганини, ижтимоий тармоқларда тарқалган хабарларни эшитиб ҳайрон қолганини билдирмоқда.
Шарифахон Аҳтамованинг айтишича, у ушбу мактабда 27 йилдан ортиқ ўқувчиларга таълим-тарбия берган. Унинг айтишича, мактабда муҳит жуда оғир, ўқитувчилар гуруҳбозликка бўлиниб қолган. Мактаб директори уларни бирлаштиришга ҳаракат қилса-да айримлар бўйсунишни исташмаяпти.
Шу маҳаллада яшайман. 27 йилдан ортиқ вақт мана шу мактабда ишлаганман. Фарзандларим ҳам шу ерни тамомлаган. Бу мактабдаги ички муҳит ўта оғирлиги, бесаранжомлиги, ҳақиқатнинг йўқлигини кўриш мумкин. Ўқитувчилар ўртасида гуруҳлар мавжуд. Айрим ўқитувчилар шу гуруҳларга қўшилиб олиб, ноҳақлик қилиб ҳалол ишлашга йўл қўйишмаяпти. Тарбия масканида ишлаётганини сезмайдиган айрим кимсалар, муҳитни бузмоқда. Мактаб директори ушбу мактабда фаолият олиб бораётганига кўп бўлмаса-да, мактабни шу даражага етказди. Оғир меҳнат қилди. Лекин бу жамоани бир томонга йўлласа, уларни бошқа томонга етаклайдиган айрим ғаламис, тарбия масканида ишлашга нолойиқ орқага тортишга уринмоқда.Кечаги ҳолат эса директор томонидан мавжуд тартиб қоидаларга қўшимча тарзда бир янгилик эди, холос. Болалар синф хоналарида юмшоқ оёқ кийимларида юради. Бунинг нимаси ёмон?! Ахир бу ерда қўрқинчли, ачинарли ҳолат бўлмади. Айрим ота-оналар бунга лоқайдлик билан қаради ва яхшиликка нисбатан шундай жавоб беришди», — дейди Шарифахон Аҳтамова.
Мактаб очилаётган куни ота-оналар томонидан шундай фикр айтилган, барчанинг ташаббуси билан йўлга қўйилган тартиб эди. Мақсад шу бинони узоқроқ сақлаб қолиш, пароканда қилмаслик. Европада 30 йиллар аввал музейларга ва бошқа биноларга шоҳу гадо оёқ киймларини алмаштириб кирган», — дейди маҳалла фаоли Абдуманноп Ҳамидов.Мактаб директори ўринбосари Сурайё Солиеванинг маълум қилишича, тармоқда эътирозларга сабаб бўлаётган тартибни жорий қилиш таклифи ота-оналар томонидан билдирилган. Узоқ муҳокамалар ва кўпчиликнинг розилиги билан жорий қилинган.
Бу тартиб ота-оналар билан келишилган ҳолда бўлган. Аслида бу фикр биздан чиқмаган. Ота-оналар шу фикрни билдирган. Шундан кейин биз буни мактаб маъмурияти ва маҳалла фаоллари билан муҳокама қилдик. Узоқ ўйлаб кўргач, шу тартиб-қоидани жорий қилдик. Яъни ўқувчилар келади, синф хонасининг эшиги тагида оёқ кийимларини алмаштиради. Бунга ҳамма рози бўлганди. Ҳозир кунлар иссиқ, эртага совуқ кунлар бошланганда бу тартиб болалар учун анча фойдали. Улар ёмғирли ҳавода, лой кўчаларни босиб келса оёқ кийимлари намланиши, совуқ ўтиши мумкин. Шунда улар синф хоналарига киришдан олдин юмшоқ енгил пойабзалларини кийиб олади. Биз ўз истакларимиз билан эмас, ота-оналарнинг розилиги билан шу тартибни амалга оширганмиз», — дейди Сурайё Солиева.
«Дарё» мухбири мактаб директорининг изоҳини билиш мақсадида у билан телефон орқали боғланишга ҳам уринди. Қўнғироқларга жавоб беришни истамаган директор смс-хабарнома орқали ўқувчининг оёқ кийимини унинг оёғидан тортиб ечмаганини, ялангоёқ киришга мажбурламаганини, бўлиб ўтган ишлар уюштирилганини шу сабабли бошқа саволларга жавоб беришни истамаганини билдирган.
«Дарё» воқеалар ривожини кузатишда давом этади.