Bugun,

  • USD 11095.31
  • RUB 173.84
  • EUR 10772.44

O‘zbekiston Markaziy banki tomonidan Toshkent shahridagi ayrim oliy ta’lim muassasalariga maxsus stipendiya e’lon qilindi

Foto: “Daryo” / Dilruh Isomiddinova

Foto: “Daryo” / Dilruh Isomiddinova

Bular quyidagi institut va universitetlarning bank ishi, iqtisodiyot, banklarda buxgalteriya hisobi, makroiqtisodiyot, statistika yo‘nalishlari bo‘yicha bakalavriaturaning kunduzgi bo‘limining so‘nggi kursida (4-kursda) hamda magistraturada ta’lim olayotgan talabalarga tanlov asosida tayinlanadi:

  • Toshkentdagi Xalqaro Vestminster universiteti;
  • Toshkentdagi Singapur menejmentni rivojlantirish instituti;
  • Toshkent davlat iqtisodiyot universiteti;
  • Toshkent Moliya instituti;
  • Jahon iqtisodiyoti va diplomatiya universiteti;
  • Toshkent shahridagi INHA universiteti;
  • Mirzo Ulug‘bek nomidagi O‘zbekiston milliy universiteti.

2022/2023-o‘quv yili uchun Markaziy bank stipendiyasi 2022-yil 3-oktabrdan tayinlanadi. 

Hujjatlarni qabul qilish muddati — 2022 yil 6—9-sentabr, ko‘rib chiqish va tanlov muddati — 12-sentabrdan 20-sentabrgacha.

Markaziy bank stipendiyasi O‘zbekiston hududida o‘rnatilgan bazaviy hisoblash miqdorining 3 baravaridan kam bo‘lmagan miqdorda belgilanadi.

Stipendiya egalari Markaziy bankning tegishli tarkibiy bo‘linmalarida har kunlik (kuniga 3 soatgacha, haftada ko‘pi bilan 15 soatdan oshmagan holda) amaliy malaka o‘taydi.

Markaziy bank stipendiyasini tayinlash uchun qo‘yidagi mezonlar belgilanadi:

  • o‘quv jarayonida (so‘nggi semestr natijalariga ko‘ra) yuqori reyting ko‘rsatkichiga ega bo‘lishi;
  • (IELTS 6.5) sertifikatiga ega bo‘lganlar ingliz tili testidan ozod etiladi;
  • iqtisodiyot bo‘yicha xalqaro yoki respublika olimpiadasi g‘olibi yoki sovrindoriga ustuvorlik beriladi.

Markaziy bank stipendiyasiga talabgorlar quyidagi hujjatlarni taqdim qilishi lozim:

  • ma’lumotnoma (obyektivka), rangli rasm;
  • pasport nusxasi;
  • nomzodning reyting (sinov) daftarchasi nusxasi;
  • O‘zbekistonda faoliyat yuritayotgan xorijiy davlatlar oliy ta’lim muassasalari talabalari uchun o‘rnatilgan tartibda fanlarni o‘zlashtirish bali to‘g‘risida ma’lumotnoma;
  • nomzodning chet tilini o‘zlashtirganligini tasdiqlovchi hujjatlar, ilmiy ishlanmalari, ilmiy konferensiya va seminarlarda ishtirok etgan ma’ruza tezislari va chop etilgan maqolalari (agar mavjud bo‘lsa).

Zarur hollarda hujjatlarning asl nusxalari talab etiladi.

Barcha hujjatlar kopiyasi (fayl yig‘majildida) talaba tahsil olayotgan universitet yoki institutning rektoratiga 2022 yil 9 sentabrgacha topshiriladi.

Stipendiatlar o‘z hoxishiga ko‘ra oliy o‘quv yurtlarini bitirganlaridan so‘ng bank tizimiga ishga joylashtiriladi.

Stipendiya egalari bakalavriaturani tugatganidan so‘ng, Markaziy bankka ishga kirgan taqdirda, tegishli xalqaro moliya institutlariga tajriba almashish va mutaxassislik bo‘yicha magistratura yoki PhD yo‘nalish bo‘yicha o‘qish uchun xorijga umumiy tanlov asosida yuborilishi mumkin.

Izoh
Asosiy yangiliklar
Mahalliy
O‘zbekistonning Istanbuldagi Bosh konsulxonasi Turkiyadagi fuqarolarga murojaat bilan chiqdi 
Mahalliy
O‘zbekistonda 7-fevral kuni 20 darajagacha iliq bo‘lishi kutilmoqda 
Mahalliy
O‘zbekistonda dollar kursi yana oshdi