Yevro 20 yil ichida eng past darajaga tushib ketdi

Yevro kursi qit’ada energiya inqirozi kuchayganidan so‘ng tushib ketdi. Bu esa korxonalar va uy xo‘jaliklari uchun uzoq sovuq qishdan darak beradi, deya xabar qilmoqda Bloomberg.

Rossiya davlat gaz ishlab chiqaruvchisi “Gazprom” kompaniyasi 2-sentabr kuni “Shimoliy oqim” quvuri orqali yetkazib berishni noma’lum muddatga to‘xtatib qo‘yishini ma’lum qilgandi. 

Shundan keyin Germaniya boshchiligidagi Yevropa davlatlari dam olish kunlarida turmush narxi inqirozi va energiya narxlarining keskin o‘sishini bartaraf etish choralarini e’lon qildi.

Dushanba, 5-sentabr kuni umumiy valyuta kursi 0,7 foizga pasayib, 98,80 AQSH sentiga tushdi. Bu 2002-yildan beri eng zaif ko‘rsatkichdir. 

Rossiyaning Ukrainaga bostirib kirishi xomashyo narxlarini keskin oshirib yuborgan va Kreml hamda Yevropa o‘rtasidagi munosabatlarga putur yetkazganidan beri energetika inqirozi chuqurlashib bormoqda. 

Bu so‘nggi yigirma yil ichida birinchi marta o‘tgan oyda yevroni dollarga tenglashtirgan muhim omil bo‘ldi. 

Qish oldidan energiya ta’minotidagi yangi keskinliklar, iste’mol narxlarining ko‘tarilishi Yevropa Markaziy bankiga (ECB) pul-kredit siyosatini kuchaytirish uchun bosim o‘tkazayotgan bir paytda mintaqa iqtisodiyotini yanada og‘irlashtirishi mumkin.

ECB payshanba, 8-sentabr kuni stavkalarni 75 bazaviy punktga oshirishi kutilmoqda. 

Muammoning jiddiyligining belgisi sifatida Germaniya energiya inqirozi fonida inflyatsiyaga qarshi kurashish uchun taxminan 65 milliard yevro miqdoridagi yordam rejasini e’lon qildi. 

Finlyandiya esa 10 milliard dollarlik dastur bilan elektr energiyasi bozorini barqarorlashtirishini aytdi. 

Shanba, 3-sentabr kuni Shvetsiya kengroq moliyaviy inqirozni bartaraf etishga intilayotgani sababli o‘z kommunal xizmatlari uchun 23 milliard dollarlik favqulodda yordamni e’lon qildi.

Goldman Sachs Group kompaniyasi turli xil yordam paketlari e’lon qilinishidan oldin keyingi uch oy davomida yevro bo‘yicha prognozlarini oldingi 99 sentdan 97 sentgacha qisqartirdi. 

Yevro kursi olti oy davomida dollarga nisbtanan pastroq bo‘lishi kutilmoqda.