Farg‘ona viloyatining Farg‘ona va Rishton tumanlarida yer maydonlarini noqonuniy sotayotganlar qo‘lga olindi, deb xabar bermoqda Bosh prokuratura huzuridagi departament.
Ma’lum qilinishicha, departamentning Farg‘ona viloyat boshqarmasi tomonidan tadbirkorlik subyektlarining huquqlarini himoya qilish yuzasidan o‘tkazilgan tergovga qadar tekshiruvda, fuqaro A.F va boshqalar tadbirkor A.ning ishonchiga kirib, unga Farg‘ona tumani “Qo‘rg‘ontepa” MFY hududidan 22 gektar ekin yer maydonini intensiv bog‘ tashkil etish uchun olib berish evaziga 68 ming dollarni qo‘lga kiritgani aniqlanib, olgan pullaridan 500 dollarni qaytargani protsessual tartibda rasmiylashtirilgan.
Bundan tashqari, A.F. boshqa bir fuqaro D.ga Farg‘ona tumanidan 10 gektar ekin yer maydoni olib berish evaziga 10 ming dollarni qo‘lga kiritib, shundan 5 700 dollarni qaytarmasdan kelayotgani aniqlangan.
Shu kabi, Rishton tuman bo‘limi tomonidan o‘tkazilgan tergovga qadar tekshiruvda, fuqaro R.M. va boshqalar “D.” fermer xo‘jaligiga qarashli 10 sotix ekin yer maydonini hujjatlarni soxtalashtirish orqali fuqaro J.ning nomiga turar-joy sifatida kadastr yig‘ma jildi rasmiylashtirib bergani aniqlangan.
Shuningdek, R.M. fuqarolar B. va A.ning ishonchiga kirib, ularga tanishlari yordamida tuman hududidan uy-joy qurish uchun yer maydoni ajratib berish evaziga 100 million so‘m va 6 000 dollarni firibgarlik yo‘li bilan qo‘lga kiritgani aniqlangan.
Qayd etilishicha, mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)