Zangiota tumani ta’mirlash ishlari tufayli 3 kunga gaz ta’minotidan uziladi

Ta’mirlash ishlari tufayli 6-sentabr kuni Toshkent viloyati Zangiota tumanida gaz ta’minoti vaqtincha to‘xtatiladi. Bu haqda “Hududgazta’minot” aksiyadorlik jamiyati xabar qildi.

Qayd etilishicha, 2022—2023-yillar kuz-qish mavsumiga gaz tarmoqlarini barqaror ishlashini ta’minlash maqsadida “Janubiy-G‘arbiy” va “Bo‘zsuv-2” GTSlari orqali tabiiy gaz bilan ta’minlanadigan hududlardagi mavjud yuqori va o‘rta bosimli gaz quvurlarini loyihaviy bosimga ko‘tarib zichlikka va mustahkamlikka sinash ishlari olib boriladi.

Shu sababli 6-sentabr kuni soat 08:00 dan 9-sentabr soat 17:00 ga qadar tumandagi “O‘rtaovul”, “Erkin”, “Qatortol”, “Bo‘zsuv” va “Turkiston” hududlaridagi jami 27040 ta aholi xonadonlarida, 780 ta tabiiy gaz ulgurji iste’molchilarida va 93 ta ijtimoiy soha obyektlarida tabiiy gaz ta’minoti vaqtinchalik to‘xtatiladi.

“Ta’mirlash ishlari tufayli yetkazilayotgan noqulayliklar uchun aholimiz va gaz iste’molchilaridan uzr so‘raymiz”, — deyiladi xabarda.