Qashqadaryo viloyatining Qamashi tumanidagi 38-maktab molxona ekani aytilib, aholi vakillari shu sabab farzandlarini mazkur maktabda o‘qitmasligi ta’kidlangan video tarqaldi. Videoda, shuningdek, maktab yangi o‘quv yiliga tayyor emasligi, ota-onalar maktab rahbariyatidan norozi ekani ma’lum qilingan. Jurnalist Murodjon Amirov asl holatni o‘rganish maqsadida Qamashidagi 38-maktabda bo‘ldi.
Tan olish kerak, aholi vakillarining maktab o‘quv yiliga tayyor emas, degan gapida jon bor. O‘quv jarayoniga oz vaqt qolgan bo‘lsa-da, maktabning hozirgi kundagi holati juda yomon. Ta’bir joiz bo‘lsa, holiga maymunlar yig‘laydi.
“Avvalo, binoning tashqi fasadi judayam abgor holda. Bu binoni ko‘rgan odam maktab yangi o‘quv yiliga tayyor ekanligiga umuman ishonmaydi. Sinfxonalar poli esa yaqin uch-to‘rt yilda umuman ta’mirlanmagan. Shuningdek, o‘qituvchilar xonasi ham ko‘rimsiz bir holda. O‘quvchilar partasi va stol-stullari esa o‘sha-o‘sha izhorlar burchagiga aylangan holicha turibdi”, — deydi vaziyatni o‘z ko‘zi bilan ko‘rgan jurnalist Murodjon Amirov.
Tuman hokimligi hamda maktab mas’ullarining ta’kidlashicha, maktab ta’miri uchun mahalliy mablag‘lar hisobidan 638 million so‘m mablag‘ ajratilgan bo‘lib, ushbu mablag‘ni “Magnit savdo” mas’uliyati cheklangan jamiyati 2022-yilning 19-avgust kuni ochiq tenderda yutib olgan. Ta’mirlash ishlari esa yangi o‘quv yiliga bir hafta muddat qolganda — 2022-yilning 22-avgust kunidan boshlangan.
Viloyat xalq ta’limi boshqarmasi axborot xizmati maktab ta’miri bu darajada kechikkanini quyidagicha izohlashga uringan.
“Maktab binosi ta’mirtalab bo‘lganligi sababli binoni ta’mirlash uchun mahalliy budjet mablag‘lari hisobidan 638 million so‘m mablag‘ ajratilib, ta’mirlash ishlarini bajarish uchun pudratchi tanlash maqsadida e-tender.uzex.uz elektron portaliga e’lon berilgan”, — deyiladi boshqarma axborotida.
Tuman hokimligi axborot xizmati ham aholi maktab ta’miri uchun 638 million so‘m mablag‘ ajratilganini avvaldan bilganini yozib, shunga qaramasdan yolg‘on gapirganini ta’kidlamoqda.
“Murojaatchilar buni bilsa-da, ijtimoiy tarmoqlarda ‘Maktab ta’miriga hech kim e’tibor qaratmagan’, degan yolg‘on ma’lumotlarni tarqatgan”, — deyiladi hokimlik munosabatida.
Jurnalist Murodjon Amirovning aniqlashtirishicha, maktabda jami 15 ta sinf bo‘lib, ta’mir ishlari bois darslarni ikki smenada tashkil qilish rejalashtirilgan.
“Xonalar ta’miri tugallanganidan so‘ng o‘quvchilar yangi xonalarda dars jarayonlarini davom ettiradi. Quruvchilar esa qolgan ta’mirlash ishlarini bajaradi”, — deydi u.
Viloyat xalq ta’limi boshqarmasi axborot xizmatining ma’lumot berishicha, 38-sonli maktab binosi 1991-yilda qurilgan. Quvvati 422 o‘rinli bo‘lgan maktabda ayni kunda 357 nafar o‘quvchi tahsil oladi. Maktabning navbatlilik koeffitsiyenti 0,8 ni tashkil etadi.
“Maktab yangi qurilgan paytda sport zali ham bo‘lgan. Hozirgi kunga kelib, sport zal plitalari sotib yuborilgan. Maktabda suv yo‘q. Suv yo‘qligi sabab bolalar suv icholmayapti. Maktab xaroba bo‘lib yotibdi. Biz bu haqda xalq ta’limi vaziriga ham murojaat qildik. Ko‘rib ketishyapti, ammo korrupsiya qilib, murojaatlarimni yopishmoqda”, — deydi ijtimoiy tarmoqlarda chiqish qilgan murojaatchilar.
Maktab ahvolidan norozi fuqarolar maktab ta’miridan ko‘ra, Asliddin ismli xodimning maktab direktori bo‘lib kelishidan noroziligini bildirgan.
“Asliddin degan yigit maktabga direktor bo‘lib kelsa, biz bolalarimizni maktabga qo‘ymaymiz. Butun xalq shunga qarshi kurashmoqda. U yigit TATUni tamomlagan, hali umuman ish tajribasi yo‘q. Yosh yigit. Endigina olti oy ishlagan. O‘zimizda 10 yil ishlagan maktab direktorlari turibdi, o‘zimizning xalqimiz. Buning bari — tuman hokimi va tuman xalq ta’limi bo‘limi mudiri Nazira Abrayeva qilgan ish”, — deydi murojaatchi.
“Daryo” jurnalisti bilan muloqot qilgan Qamashi tuman xalq ta’limi bo‘limi mudiri Nazira Abrayeva murojaatchilar maktab ta’miridan ko‘ra, o‘zining odamini maktab direktorligiga qo‘yish ilinjida yurganini aytib, “maktab ta’miri yomon deyishdi, mahalliy budjetdan pul ajratilib, ta’mir boshlab yuborildi. Xo‘sh, yana nega norozisizlar desak, maktab direktori biz aytgan, o‘zimizning qishloqning odamlari bo‘lishi kerak deyishmoqda. Bu davlat idorasi, unga tayinlanayotgan rahbar ham davlat talabidan kelib chiqqan holda tayinlanadi. Tanlovdan kim o‘tsa, shu rahbar bo‘ladi deb tushuntirsak-da, tushunishmayapti”, — deydi Nazira Abrayeva.
Jurnalist Murodjon Amirovning surishtirishicha, tarmoqlarda e’lon qilingan videoda direktorlik lavozimiga noloyiq, korrupsiya yo‘li bilan ushbu lavozimga kelgan deya ta’riflangan Asliddin Ochilov Davlat fuqarolik xizmatchilari vakant lavozimlarining yagona ochiq portali orqali ochiq tanlov asosida ushbu vakant lavozimga hujjat topshirgan va tanlovda g‘olib bo‘lgan kadr hisoblanadi. Yosh rahbar Asliddiin Ochilov ushbu mojaroli vaziyatdan xabar topgach, maktabda ishlamaslik haqidagi arizasini yozgan. Hozirda maktabning direktorlik lavozimi vakant. Direktor vazifasini bajarish esa vaqtinchaga direktorning o‘quv ishlari bo‘yicha o‘rinbosari Manzura Toshmurodovaga yuklatilgan.
“Ayni paytda maktab direktori hamda o‘rinbosari sifatida faoliyat yuritib kelayotgan mas’ullar bilan suhbatlashganimizda kech bo‘lsa-da, maktab ta’miri uchun harakat boshlanganini, tez orada ta’mirlash ishlari yakunlanib, maktab yangi o‘quv yiliga tayyor qilib berilishi va’da qilinayotganini aytmoqda. Ularda ishlar qilinyapti-ku degan shukronalik hissi bor. Bu yaxshi, albatta. Ammo maktab binosini molxonaga o‘xshatgan murojaatchilar esa, ko‘proq maktab ta’miridan emas, maktabga kimni direktor qilib tayinlashdan manfaatdorga o‘xshamoqda”, — deydi jurnalist.
Qamashidagi mazkur maktab mashmashasi orqali kimdir direktorlikka o‘z odamini qo‘yish ilinjida ekani, mas’ullar ta’mir kechikkanini izohlab, har xil vajlar bilan o‘zini oqlashga urinayotganini kechirsa, bu holatlarga ko‘z yumsa bo‘lar. Ammo maktab binosining yangi o‘quv yiliga tayyor emasligi, 5-sentabr kuni birinchi qo‘ng‘iroq jarangi yangraganidan so‘ng ushbu maktab o‘quvchilarining qaysi sinfxonaga kirishini bilmay, ovora bo‘lishiga qanday ko‘z yumish mumkin? Buning uchun kim javob beradi? Tuman hokimimi yoki ta’lim mas’ullari?
“Daryo” voqealar rivojini kuzatishda davom etadi.
Izoh (0)