Қашқадарё вилоятининг Қамаши туманидаги 38-мактаб молхона экани айтилиб, аҳоли вакиллари шу сабаб фарзандларини мазкур мактабда ўқитмаслиги таъкидланган видео тарқалди. Видеода, шунингдек, мактаб янги ўқув йилига тайёр эмаслиги, ота-оналар мактаб раҳбариятидан норози экани маълум қилинган. Журналист Муроджон Амиров асл ҳолатни ўрганиш мақсадида Қамашидаги 38-мактабда бўлди.
Тан олиш керак, аҳоли вакилларининг мактаб ўқув йилига тайёр эмас, деган гапида жон бор. Ўқув жараёнига оз вақт қолган бўлса-да, мактабнинг ҳозирги кундаги ҳолати жуда ёмон. Таъбир жоиз бўлса, ҳолига маймунлар йиғлайди.
«Аввало, бинонинг ташқи фасади жудаям абгор ҳолда. Бу бинони кўрган одам мактаб янги ўқув йилига тайёр эканлигига умуман ишонмайди. Синфхоналар поли эса яқин уч-тўрт йилда умуман таъмирланмаган. Шунингдек, ўқитувчилар хонаси ҳам кўримсиз бир ҳолда. Ўқувчилар партаси ва стол-стуллари эса ўша-ўша изҳорлар бурчагига айланган ҳолича турибди», — дейди вазиятни ўз кўзи билан кўрган журналист Муроджон Амиров.
Туман ҳокимлиги ҳамда мактаб масъулларининг таъкидлашича, мактаб таъмири учун маҳаллий маблағлар ҳисобидан 638 миллион сўм маблағ ажратилган бўлиб, ушбу маблағни «Магнит савдо» масъулияти чекланган жамияти 2022 йилнинг 19 август куни очиқ тендерда ютиб олган. Таъмирлаш ишлари эса янги ўқув йилига бир ҳафта муддат қолганда — 2022 йилнинг 22 август кунидан бошланган.
Вилоят халқ таълими бошқармаси ахборот хизмати мактаб таъмири бу даражада кечикканини қуйидагича изоҳлашга уринган.
«Мактаб биноси таъмирталаб бўлганлиги сабабли бинони таъмирлаш учун маҳаллий бюджет маблағлари ҳисобидан 638 миллион сўм маблағ ажратилиб, таъмирлаш ишларини бажариш учун пудратчи танлаш мақсадида e-tender.uzex.uz электрон порталига эълон берилган», — дейилади бошқарма ахборотида.
Туман ҳокимлиги ахборот хизмати ҳам аҳоли мактаб таъмири учун 638 миллион сўм маблағ ажратилганини аввалдан билганини ёзиб, шунга қарамасдан ёлғон гапирганини таъкидламоқда.
«Мурожаатчилар буни билса-да, ижтимоий тармоқларда ‘Мактаб таъмирига ҳеч ким эътибор қаратмаган’, деган ёлғон маълумотларни тарқатган», — дейилади ҳокимлик муносабатида.
Журналист Муроджон Амировнинг аниқлаштиришича, мактабда жами 15 та синф бўлиб, таъмир ишлари боис дарсларни икки сменада ташкил қилиш режалаштирилган.
«Хоналар таъмири тугалланганидан сўнг ўқувчилар янги хоналарда дарс жараёнларини давом эттиради. Қурувчилар эса қолган таъмирлаш ишларини бажаради», — дейди у.
Вилоят халқ таълими бошқармаси ахборот хизматининг маълумот беришича, 38-сонли мактаб биноси 1991 йилда қурилган. Қуввати 422 ўринли бўлган мактабда айни кунда 357 нафар ўқувчи таҳсил олади. Мактабнинг навбатлилик коэффициенти 0,8 ни ташкил этади.
«Мактаб янги қурилган пайтда спорт зали ҳам бўлган. Ҳозирги кунга келиб, спорт зал плиталари сотиб юборилган. Мактабда сув йўқ. Сув йўқлиги сабаб болалар сув ичолмаяпти. Мактаб хароба бўлиб ётибди. Биз бу ҳақда халқ таълими вазирига ҳам мурожаат қилдик. Кўриб кетишяпти, аммо коррупция қилиб, мурожаатларимни ёпишмоқда», — дейди ижтимоий тармоқларда чиқиш қилган мурожаатчилар.
Мактаб аҳволидан норози фуқаролар мактаб таъмиридан кўра, Аслиддин исмли ходимнинг мактаб директори бўлиб келишидан норозилигини билдирган.
«Аслиддин деган йигит мактабга директор бўлиб келса, биз болаларимизни мактабга қўймаймиз. Бутун халқ шунга қарши курашмоқда. У йигит ТАТУни тамомлаган, ҳали умуман иш тажрибаси йўқ. Ёш йигит. Эндигина олти ой ишлаган. Ўзимизда 10 йил ишлаган мактаб директорлари турибди, ўзимизнинг халқимиз. Бунинг бари — туман ҳокими ва туман халқ таълими бўлими мудири Назира Абраева қилган иш», — дейди мурожаатчи.
«Дарё» журналисти билан мулоқот қилган Қамаши туман халқ таълими бўлими мудири Назира Абраева мурожаатчилар мактаб таъмиридан кўра, ўзининг одамини мактаб директорлигига қўйиш илинжида юрганини айтиб, «мактаб таъмири ёмон дейишди, маҳаллий бюджетдан пул ажратилиб, таъмир бошлаб юборилди. Хўш, яна нега норозисизлар десак, мактаб директори биз айтган, ўзимизнинг қишлоқнинг одамлари бўлиши керак дейишмоқда. Бу давлат идораси, унга тайинланаётган раҳбар ҳам давлат талабидан келиб чиққан ҳолда тайинланади. Танловдан ким ўтса, шу раҳбар бўлади деб тушунтирсак-да, тушунишмаяпти», — дейди Назира Абраева.
Журналист Муроджон Амировнинг суриштиришича, тармоқларда эълон қилинган видеода директорлик лавозимига нолойиқ, коррупция йўли билан ушбу лавозимга келган дея таърифланган Аслиддин Очилов Давлат фуқаролик хизматчилари вакант лавозимларининг ягона очиқ портали орқали очиқ танлов асосида ушбу вакант лавозимга ҳужжат топширган ва танловда ғолиб бўлган кадр ҳисобланади. Ёш раҳбар Аслиддиин Очилов ушбу можароли вазиятдан хабар топгач, мактабда ишламаслик ҳақидаги аризасини ёзган. Ҳозирда мактабнинг директорлик лавозими вакант. Директор вазифасини бажариш эса вақтинчага директорнинг ўқув ишлари бўйича ўринбосари Манзура Тошмуродовага юклатилган.
«Айни пайтда мактаб директори ҳамда ўринбосари сифатида фаолият юритиб келаётган масъуллар билан суҳбатлашганимизда кеч бўлса-да, мактаб таъмири учун ҳаракат бошланганини, тез орада таъмирлаш ишлари якунланиб, мактаб янги ўқув йилига тайёр қилиб берилиши ваъда қилинаётганини айтмоқда. Уларда ишлар қилиняпти-ку деган шукроналик ҳисси бор. Бу яхши, албатта. Аммо мактаб биносини молхонага ўхшатган мурожаатчилар эса, кўпроқ мактаб таъмиридан эмас, мактабга кимни директор қилиб тайинлашдан манфаатдорга ўхшамоқда», — дейди журналист.
Қамашидаги мазкур мактаб машмашаси орқали кимдир директорликка ўз одамини қўйиш илинжида экани, масъуллар таъмир кечикканини изоҳлаб, ҳар хил важлар билан ўзини оқлашга уринаётганини кечирса, бу ҳолатларга кўз юмса бўлар. Аммо мактаб биносининг янги ўқув йилига тайёр эмаслиги, 5 сентябрь куни биринчи қўнғироқ жаранги янграганидан сўнг ушбу мактаб ўқувчиларининг қайси синфхонага киришини билмай, овора бўлишига қандай кўз юмиш мумкин? Бунинг учун ким жавоб беради? Туман ҳокимими ёки таълим масъуллари?
«Дарё» воқеалар ривожини кузатишда давом этади.
Изоҳ (0)