Senatning Axborot siyosati va davlat organlarida ochiqlikni ta’minlash masalalari qo‘mitasi, Korrupsiyaga qarshi kurashish agentligi hamda Davlat statistika qo‘mitasi hamkorligida “Davlat organlari va tashkilotlari tomonidan ijtimoiy ahamiyatga molik ochiq ma’lumotlarni rasmiy veb-saytlar va Ochiq ma’lumotlar portaliga (data.egov.uz) joylashtirish masalalari” mavzusida o‘quv seminari tashkil etildi.
Unda viloyat, tuman (shahar) xalq deputatlari mahalliy kengashlarining axborot siyosati va mahalliy davlat organlarida ochiqlikni ta’minlash masalalari bo‘yicha doimiy komissiyalari raislari, kotibiyat mudirlari, davlat organlari va tashkilotlari faoliyatining ochiqligini ta’minlash masalalariga mas’ul bo‘lgan axborot xizmatlari rahbarlari ishtirok etdi.
Seminarda davlat organlari va tashkilotlari tomonidan normativ-huquqiy hujjatlar bilan belgilangan ma’lumotlarni Internet tarmog‘iga joylashtirish majburiyatlariga rioya etilish holati, shu jumladan, mahalliy davlat hokimiyati organlari tomonidan ma’lumotlarni Ochiq ma’lumotlar portali (data.egov.uz)da joylashtirishda yo‘l qo‘yib kelinayotgan tizimli kamchiliklar tahlil qilinib, bu boradagi yangiliklar yuzasidan soha mutaxassislar batafsil tushuntirishlar berdi.
O‘tgan vaqt mobaynida olib borilgan o‘rganishlar natijasida mahalliy davlat hokimiyati organlari, vazirlik va idoralar tomonidan ochiqlikni ta’minlashga oid normativ-huquqiy hujjatlar talablarini bajarishda hamon sustkashlikka yo‘l qo‘yilayotgani aniqlangan. Xususan, 2022-yil 1-iyuldan boshlab Ochiq e’lon qilinishi kerak bo‘lgan ijtimoiy ahamiyatga molik ma’lumotlar ro‘yxatiga kiritilgan axborotlarni davlat organlari va tashkilotlari rasmiy veb-saytining bosh sahifasida alohida bo‘limga joylashtirilishi tartibi belginlangan.
Biroq 2022-yil 18-iyul holatiga ko‘ra, 121 ta davlat organi va tashkilotining 37 tasi alohida bo‘limni rasmiy veb-saytning bosh sahifasida tashkil etmagani, 15 tasida alohida bo‘lim umuman tashkil etilmagani qayd etildi. Mahalliy davlat hokimiyati organlari tomonidan ijtimoiy ahamiyatga molik ma’lumotlarni o‘z rasmiy veb-saytda to‘liq e’lon qilinishida bir qator jiddiy kamchiliklarga yo‘l qo‘yilayotgani aytib o‘tildi.
Bundan tashqari, seminarda davlat organlari va tashkilotlarining ochiqlik bo‘yicha amalga oshirilayotgan ishlarning samaradorligi va natijadorligini baholashga qaratilgan Ochiqlik indeksi tizimi joriy etilgani haqida ma’lumot berildi. Ochiqlik indeksi “0” balldan “100” ballgacha baholanib, davlat organlari va tashkilotlarining faoliyati samaradorligi “yashil”, “sariq”, “qizil” toifalarga ajratiladi.
Shuningdek, yuqori malakali mutaxassis va ekspertlaridan iborat tarkibda Ochiqlikni ta’minlash sohasida amalga oshirilayotgan ishlarning samaradorligi va natijadorligini baholash komissiyasi faoliyati yo‘lga qo‘yildi. Mazkur komissiyaning ustuvor vazifasi davlat organlari va tashkilotlarining Ochiqlik indeksini baholash natijalarini ko‘rib chiqish hamda u Ochiqlik indeksini hisoblash haqida yakuniy qaror qabul qiladigan, muvofiqlashtiruvchi organ hisoblanadi.
Izoh (0)