Сенатнинг Ахборот сиёсати ва давлат органларида очиқликни таъминлаш масалалари қўмитаси, Коррупцияга қарши курашиш агентлиги ҳамда Давлат статистика қўмитаси ҳамкорлигида «Давлат органлари ва ташкилотлари томонидан ижтимоий аҳамиятга молик очиқ маълумотларни расмий веб-сайтлар ва Очиқ маълумотлар порталига (data.egov.uz) жойлаштириш масалалари» мавзусида ўқув семинари ташкил этилди.
Унда вилоят, туман (шаҳар) халқ депутатлари маҳаллий кенгашларининг ахборот сиёсати ва маҳаллий давлат органларида очиқликни таъминлаш масалалари бўйича доимий комиссиялари раислари, котибият мудирлари, давлат органлари ва ташкилотлари фаолиятининг очиқлигини таъминлаш масалаларига масъул бўлган ахборот хизматлари раҳбарлари иштирок этди.
Семинарда давлат органлари ва ташкилотлари томонидан норматив-ҳуқуқий ҳужжатлар билан белгиланган маълумотларни Интернет тармоғига жойлаштириш мажбуриятларига риоя этилиш ҳолати, шу жумладан, маҳаллий давлат ҳокимияти органлари томонидан маълумотларни Очиқ маълумотлар портали (data.egov.uz)да жойлаштиришда йўл қўйиб келинаётган тизимли камчиликлар таҳлил қилиниб, бу борадаги янгиликлар юзасидан соҳа мутахассислар батафсил тушунтиришлар берди.
Ўтган вақт мобайнида олиб борилган ўрганишлар натижасида маҳаллий давлат ҳокимияти органлари, вазирлик ва идоралар томонидан очиқликни таъминлашга оид норматив-ҳуқуқий ҳужжатлар талабларини бажаришда ҳамон сусткашликка йўл қўйилаётгани аниқланган. Хусусан, 2022 йил 1 июлдан бошлаб Очиқ эълон қилиниши керак бўлган ижтимоий аҳамиятга молик маълумотлар рўйхатига киритилган ахборотларни давлат органлари ва ташкилотлари расмий веб-сайтининг бош саҳифасида алоҳида бўлимга жойлаштирилиши тартиби белгинланган.
Бироқ 2022 йил 18 июль ҳолатига кўра, 121 та давлат органи ва ташкилотининг 37 таси алоҳида бўлимни расмий веб-сайтнинг бош саҳифасида ташкил этмагани, 15 тасида алоҳида бўлим умуман ташкил этилмагани қайд этилди. Маҳаллий давлат ҳокимияти органлари томонидан ижтимоий аҳамиятга молик маълумотларни ўз расмий веб-сайтда тўлиқ эълон қилинишида бир қатор жиддий камчиликларга йўл қўйилаётгани айтиб ўтилди.
Бундан ташқари, семинарда давлат органлари ва ташкилотларининг очиқлик бўйича амалга оширилаётган ишларнинг самарадорлиги ва натижадорлигини баҳолашга қаратилган Очиқлик индекси тизими жорий этилгани ҳақида маълумот берилди. Очиқлик индекси «0» баллдан «100» баллгача баҳоланиб, давлат органлари ва ташкилотларининг фаолияти самарадорлиги «яшил», «сариқ», «қизил» тоифаларга ажратилади.
Шунингдек, юқори малакали мутахассис ва экспертларидан иборат таркибда Очиқликни таъминлаш соҳасида амалга оширилаётган ишларнинг самарадорлиги ва натижадорлигини баҳолаш комиссияси фаолияти йўлга қўйилди. Мазкур комиссиянинг устувор вазифаси давлат органлари ва ташкилотларининг Очиқлик индексини баҳолаш натижаларини кўриб чиқиш ҳамда у Очиқлик индексини ҳисоблаш ҳақида якуний қарор қабул қиладиган, мувофиқлаштирувчи орган ҳисобланади.
Изоҳ (0)