Zarina Nizomiddinova qachon O‘zbekistonga qaytishi hamda kinodagi faoliyatini davom ettirishi haqidagi savolga javob berdi (foto, video)
Aktrisa Zarina Nizomiddinova “Daryo” muxbiri Nargiza Murodovaning qachon O‘zbekistonga butunlay qaytishi va endilikda qanday filmlarda suratga tushishi istayotgani haqidagi savollarga quyidagicha javob berdi.
O‘zbekistonga qaytaman, menda kichik ijodiy tanaffus bo‘ldi. Qaytish niyatim, albatta, bor. Shuncha yil qilgan mehnatimni birdan tashlab ketolmayman. Filmlarda suratga tushaman, ammo avvalgidek ko‘p emas. Agar yaxshi loyihalar bo‘lsa, bir yilda 1—2 ta rollarni ijro etishim mumkin. Avvaldan ham rejissorlarga bo‘lgan talabim yuqori edi. Sinchkovlik bilan takliflarni qabul qilardim. Talabimning yanada ortishiga sabab yilning faqat yoz oyida suratga tushish uchun O‘zbekistonga kela olaman, — deydi aktrisa Zarina Nizomiddinova.
Eslatib o‘tamiz, aktrisa Zarina Nizomiddinova juda erta oila qurgan. U katta o‘g‘li Temurbekni 18 yoshida dunyoga keltirgan. Xorijdagi turmushi u qadar muvaffaqiyatli kechmagach, Toshkentga qaytib ijodini davom ettirgan. 2015-yilning 18-yanvar kuni esa ikkinchi bor oila qurdi. Navbatdagi turmush o‘rtog‘i o‘zidan yoshi ancha katta va tadbirkorlik bilan shug‘ullanadi. Afsuski, aktrisaning bu nikohi ham uzoqqa cho‘zilmadi. Oradan to‘rt yil o‘tib, aktrisaning shaxsiy hayotida yana bir o‘zgarish sodir bo‘ldi. U Moskva shahrida istiqomat qiluvchi, o‘zidan 12 yosh katta inson bilan oila qurdi va 2020-yilda Saidumar ismli o‘g‘lini dunyoga keltirdi.
Aktrisa turli mish-mishlarga oydinlik kiritish maqsadida yaqinda Instagram sahifasiga turmush o‘rtog‘i bilan tushgan suratini joyladi. Rasmni shunchaki “Ana bo‘lmasa” deya izohladi. Ammo o‘g‘lining Instagram profiliga joylangan rasmga “Ota va onam” deya izoh qoldirdi. Aktrisa muxlislariga turmush o‘rtog‘ining asli toshkentlik ekanligini, ammo xorijda yashaganligini ma’lum qilgandi. U tadbirkorlik bilan shug‘ullanadi va sportga qiziqadi.
Mavzuga doir:
- “Hozir kimgadir nimanidir isbotlaydigan vaqt emas”. Zarina Nizomiddinova mish-mishlarga izoh bermasligi va o‘zidan 12 yosh katta turmush o‘rtog‘i haqida so‘zlab berdi
- Birinchi turmushi omadsizlikka uchragach, ikkinchi yoki uchinchisidan baxt topgan o‘zbek shou-biznesi vakillari (foto)
