Yurgen Klopp YCHL guruh bosqichi uchun tashlangan qur’a haqida: Bizni har doimgidek yangi saboqlar kutmoqda

“Liverpul” bosh murabbiyi Yurgen Klopp Chempionlar Ligasi guruh bosqichi uchun tashlangan qur’aga munosabat bildirdi.

Merisaydliklar “Ayaks”, “Napoli” va “Reynjers” bilan bir guruhdan joy oldi.

Barcha klublar tarix nuqtai nazaridan yuqori darajada, shuning uchun barchada imkoniyat bor, deb hisoblayman. Yaxshi yangiliklardan biri, bizda ham imkon bor.

Bu oson yo‘llar izlanadigan musobaqa emas, bu yerda standartlar aqlbovar qilmas darajada yuqori.

Joriy mavsumda guruh bosqichi avvalgilaridan kamroq vaqtni o‘z ichiga oladi, shu sabab nafaqat raqiblarga, balki yangi ritmga ham tayyor turishimiz kerak.

Raqiblar haqida ma’lumotlar topish uchun chuqur izlanish shart emas. Bir necha yil oldin “Ayaks”ga qarshi ikkita qiyin o‘yin o‘tkazgandik, “Napoli” bilan esa tez-tez uchrashib turamiz. Biroq bizni har doimgidek yangi saboqlar kutmoqda.

“Reynjers” — biz uchun yangi raqib. Lekin ular haqida ham bilamiz. So‘nggi yillarda jamoa qiziqarli o‘yinlarni namoyish etyapti, guruh bosqichiga chiqish uchun ajoyib ishni amalga oshirdi.

Hozirda barcha 6 uchrashuv ham kuchli bosim ostida o‘tishi tushunarli. Biz sinovdan o‘tishimiz mumkin bo‘lgan juda yaxshi guruh.

Yurgen Klopp, “Liverpul” bosh murabbiyi