“Real” futbolchilari Yevropaning eng yaxshi o‘yinchisiga beriladigan sovrinni yutish bo‘yicha “Barselona” va “Bavariya”ni ortda qoldirdi

“Real” hujumchisi Karim Benzema UEFA talqini bo‘yicha Yevropaning 2021/22-yilgi mavsumdagi eng yaxshi o‘yinchisi deb topildi.

Shu tariqa ushbu sovringa ega chiqqan “Real” futbolchilari soni uch nafarga yetdi. Benzemadan avval Krishtianu Ronaldu (2014, 2016, 2017-yillar) va Luka Modrich (2018) Yevropada tengsiz deb topilgandi.

Hali hech qaysi jamoaning turli uch futbolchisi bu sovrinni qo‘lga kiritmagandi. “Barselona” (Leo Messi, Andres Inyesta) va “Bavariya”ning (Frank Riberi, Robert Levandovski) ikki nafardan o‘yinchisi bu nomga loyiq ko‘rilgan.

Yevropaning eng yaxshi o‘yinchisiga topshiriladigan mazkur sovrin 2011-yilda ta’sis etilgan bo‘lib, Ronaldu uni qo‘lga kiritish bo‘yicha (uch marta) rekordchi hisoblanadi.