Maktabgacha ta’lim vazirligi ayol bog‘cha hududida eri tomonidan kaltaklangani yuzasidan ma’lumot berdi

Toshkent viloyati Quyi Chirchiq tumanida erkak xotinini bog‘cha bolalari ko‘z o‘ngida kaltaklagani aks etgan video tarqalgandi. Maktabgacha ta’lim vazirligi holat yuzasidan ma’lumot berdi.

Aniqlanishicha, 25-avgust kuni soat taxminan 17:00 va 18:00 lar oralig‘ida Quyi Chirchiq tumanidagi “Lastochka” nomli oilaviy nodavlat maktabgacha ta’lim tashkilotiga umuman aloqador bo‘lmagan er-xotin janjali bolalar ko‘z o‘ngida sodir etilgan.

Ularning tortishuvi avvaliga ko‘chada boshlangan. So‘ng erining kaltagidan qochgan ayol ko‘zi tushgan darvoza tomon qochib kirib, yashirinmoqchi bo‘lgan. Er ayolining orqasidan kirib, janjal holati nodavlat maktabgacha ta’lim tashkiloti ichida davom etgan.

Xabarda ta’kidlanishicha, do‘pposlangan ayol ushbu bog‘chada umuman ishlamagan.

Mazkur holat yuzasidan hududiy IIB tomonidan tergovga qadar tekshirish harakatlari olib borilmoqda.