Тошкент вилояти Қуйи Чирчиқ туманида эркак хотинини боғча болалари кўз ўнгида калтаклагани акс этган видео тарқалганди. Мактабгача таълим вазирлиги ҳолат юзасидан маълумот берди.
Аниқланишича, 25 август куни соат тахминан 17:00 ва 18:00 лар оралиғида Қуйи Чирчиқ туманидаги «Ласточка» номли оилавий нодавлат мактабгача таълим ташкилотига умуман алоқадор бўлмаган эр-хотин жанжали болалар кўз ўнгида содир этилган.
Уларнинг тортишуви аввалига кўчада бошланган. Сўнг эрининг калтагидан қочган аёл кўзи тушган дарвоза томон қочиб кириб, яширинмоқчи бўлган. Эр аёлининг орқасидан кириб, жанжал ҳолати нодавлат мактабгача таълим ташкилоти ичида давом этган.
Хабарда таъкидланишича, дўппосланган аёл ушбу боғчада умуман ишламаган.
Мазкур ҳолат юзасидан ҳудудий ИИБ томонидан терговга қадар текшириш ҳаракатлари олиб борилмоқда.
Изоҳ (0)