Ijtimoiy tarmoqlarda tarqalgan “Chilonzor tumani sektor rahbarlariga kimningdir havasi kelganov” sarlavhasi ostidagi xabar yuzasidan Andijon viloyati hokimligi matbuot xizmati munosabat bildirdi.
Qayd etilishicha, ushbu holat Ekologiya va atrof-muhitni muhofaza qilish boshqarmasi mas’ullari tomonidan joyiga borib o‘rganilganda, Shahrixon tumani “Qo‘rg‘oncha” MFY hududidan o‘tgan A373-Andijon—Toshkent avtomagistral yo‘lining o‘ng qirg‘og‘ida joylashgan archa (mojevelnik) manzarali qimmatbaho daraxtlaridan jami 28 tupini tegishli tartibda ruxsatnoma olmasdan, tuman obodonlashtirish boshqarmasi mas’ul shaxslari kesib yuborgani aniqlandi.
Mazkur holatda “O‘simlik dunyosini muhofaza qilish va undan foydalanish to‘g‘risida”gi qonunining 37-moddasi 2-bandi, hamda Vazirlar Mahkamasining 2019-yil 17-yanvardagi “Davlat o‘rmon fondiga kirmaydigan yerlarda daraxtlar va butalardan foydalanishni tartibga solish va ulardan foydalanish sohasida ruxsat berish tartibini yanada takomillashtirish to‘g‘risida”gi 43-sonli qarori 4-ilovasi bilan tasdiqlangan Davlat o‘rmon fondiga kirmaydigan yerlarda daraxtlar va butalarni kesganlik uchun to‘lov taksasiga asosan, o‘simlik dunyosiga yetkazilgan zararni undirish miqdorini hisob-kitob qilinganda ko‘p miqdorda zarar yetkazilgani aniqlandi.
Ushbu holat viloyat hokimligi nazoratida o‘rganilib, qonuniy baho berish uchun tuman prokuraturasiga yuborildi.
Izoh (0)