Bugun,

  • USD 11095.31
  • RUB 173.84
  • EUR 10772.44

Kobulda “Non, ish, erkinlik” shiori bilan ko‘chaga chiqqan ayollarning namoyishi tarqatib yuborildi. Namoyish vaqtida “Tolibon” jangarilari havoga o‘q uzgan va namoyishchilarni kaltaklagan. Bir nechta qurbonlar ham bor. Bu haqda Asia-Plus xabar bermoqda.

Foto: Asia-Plus

Foto: Asia-Plus

Shanba (13-avgust) kuni 40 ga yaqin ayol Ta’lim vazirligi binosi oldiga yig‘ilgan.

Ijtimoiy tarmoqlarda joylashtirilgan surat va videolarda “Tolibon” jangarilari havoga o‘q uzgani aks etgan. Ayollar tarqala boshlagandan keyin ham “Tolibon” ularni ta’qib qilib, avtomat bilan kaltaklagan.

Afg‘oniston Mustaqil jurnalistlar assotsiatsiyasining ma’lum qilishicha, “Tolibon” uch nafar xorijlik jurnalist va bir mahalliy muxbirni namoyishni yoritishga uringani uchun hibsga olgan. Yana ikki mahalliy jurnalist yaralangan.

Kobuldagi Mustaqil jurnalistlar uyushmasi a’zolaridan biri Hujatullo Mujadidiy xorij telekanallariga bergan intervyusida hibsga olingan jurnalistlar Germaniya, Daniya va Norvegiyadan ekanini aytgan.

Xalqaro amnistiya tashkiloti, “Tolibon” ayollarning tinch namoyishini tarqatish uchun “ortiqcha kuch” ishlatgani haqidagi xabarlardan xavotirini bildirdi. Tashkilotning Twitter’dagi sahifasida aytilishicha, ayollar faqat “tinch namoyish o‘tkazgan va ularning huquqlari hurmat qilinishini talab qilgan xolos”.

Namoyish chog‘ida tasvirga olingan videoda ayollar marshga chiqib, mehnat qilish huquqi va afg‘on jamiyatida siyosiy ishtirok etishni talab qilib, shiorlar bilan qichqirayotgani aks etgan.

Namoyishchilardan birining qo‘lida “15-avgust – qora kun” plakati bo‘lgan. Bir yil avval aynan shu kuni Afg‘onistonda “Tolibon” hokimiyatni qo‘lga kiritgan edi.

“Tolibon” hukumati ayollarning ishlash va o‘qish huquqlarini cheklab qo‘ygan. Qizlarning maktablarga borishiga va ayollarning ishlashiga ruxsat berilmaydi. Shu bilan birgalikda, qonunlarga ko‘ra, ayollar ko‘chada yuzlarini to‘liq yopishlari kerak va erkaksiz uydan chiqishga haqli emaslar.

Hozircha dunyoning hech bir davlati “Tolibon” hukumatini tan olmagan.

Xalqaro hamjamiyatning “Tolibon”ni tan olish sharti mamlakatda inklyuziv hukumatni shakllantirish, shuningdek, ayollar va qizlarning asosiy huquq va erkinliklarini ta’minlashdan iborat bo‘ladi.

Mavzuga doir: “Tolibon” odob-axloq qoidalari va uy-ro‘zg‘or ishlarini o‘rganish o‘rta maktab o‘quvchilarini maktablarga qabul qilishning zaruriy sharti deb atadi

Izoh
Asosiy yangiliklar
Dunyo
“Turkiya yangi dunyo tartibining markazida bo‘lishi kerak” — Erdo‘g‘on
Mahalliy
Andijonda 41 kishi jarohatlangan avtohalokat qurbonlari soni 4 nafarga yetdi
Mahalliy
O‘zbekistonda pomidor narxi barqarorlashdi