"Қадриятлар ва миллий анъаналар" — Инновацион ривожланиш вазирлиги Ўзбекистонга миллий мессенжер нега кераклиги ҳақида

Ўзбекистонда миллий ижтимоий тармоқ ва мессенжер яратиш бўйича танлов эълон қилингани ҳақида хабар берилган эди.

Танлов ташкилотчиси — Инновацион ривожланиш вазирлиги Ўзбекистонга бундай дастурлар нима учун керак эканлигини гапириб берди.

Ўзбекистонда яратилган ижтимоий тармоқлар

«Дарё»нинг ҳисоб-китобларига кўра, сўнгги 15 йил ичида Ўзбекистонда 32 та миллий ижтимоий тармоқ яратилган. 2022 йилга келиб уларнинг барчаси ёпилган.

2016 йилда Uzinfocom маркази Ахборот технологиялари ва коммуникацияларини ривожлантириш вазирлиги кўмагида «Davra.uz» сайтини ишлаб чиқди. Сайт ҳали ҳам расмий равишда бор, аммо тармоқ кўп йиллардан бери ишламаяпти.

Бундан ташқари 2016 йилда «Учар» деб номланган тармоқ ҳам пайдо бўлган ва оммалашмаган. 2018 йилда эса UMS’га тегишли UzChat мессенжери ишга туширилган, у ҳам оммалашмаган.

Муваффақиятли лойиҳалардан бири «Мулоқот» ижтимоий тармоғи эди. У деярли 7 йил ишлаб, 2018 йилда ёпилган.

Нега миллий мессенжерлар оммалашмаган?

Инновацион ривожланиш вазирлигига кўра, яратилган миллий мессенжерларнинг оммалашмаслик сабаблари асосан киберхавфсизлик, маълумотларнинг ишончли сақланиши ҳамда барқарор ишлаш қобилияти мавжуд эмаслигидир.

Кўплаб яратилган платформалар уй шароитидаги ёки офис серверларига ўрнатилган ва фойдаланувчилар сони бир неча мингтага етганида эса фаолиятида узилишлар кузатилган.

Ҳозирги кунда ижтимоий тармоқлар яратишда мана шу омилларга алоҳида эътибор берилмоқда, — дейилади вазирлик хабарида.

Мамлакатда жами 24,1 млн нафар интернет фойдаланувчилари мавжуд. Ушбу рақамлар йилига ўртача 1,4 фоизга ўсмоқда.

Бундан ташқари аҳолининг 28,5 фоиз қисми 18-35 ёш оралиғида бўлиб, ижтимоий тармоқлар, жумладан мессенжерлардан фаол фойдаланади.

«Қадриятлар ва миллий анъаналар»

Мамлакатда миллий мессенжерлар ташкил қилиш учун маҳаллий бозор имконияти мавжуд.

Бундан ташқари, глобаллашув жараёнларида ёшларимизнинг маънавий ва маърифий салоҳиятини ижобий шакллантиришда миллий брендимиз билан яратилган мессенжерларнинг ўрни беқиёс, — дейилади вазирлик хабарида.

Вазирлик мутахассисларига кўра, халқаро тенденциялар интернет фойдаланувчилари орасида ижтимоий тармоқлар ва мессенжерлардан фаол фойдаланувчилар сони кун сайин кўпайиб бораётганини кўрсатмоқда.

Бундай шароитда мамлакатимизда ҳам миллий қадриятларимизга мос, жаҳоннинг илғор технологиялари ва тажрибаларидан самарали фойдаланган ҳолда миллий ижтимоий тармоқлар ва мессенжерларни яратиш мақсадга мувофиқ ҳисобланади, — дейилади хабарда.

Вазирликка кўра, Ўзбекистонда миллий мессенжер яратилиши нафақат қадриятлар ва миллий анъаналар нуқтаи назаридан балки халқаро майдонда кибероламнинг салбий таъсирларидан халқни ҳимоя қилиш, инсон учун энг қимматли бўлган шахсий маълумотларнинг сақланишини кафолатлаш, Жанубий Корея, Хитой, Япония, Россия ҳамда Канада каби мамлакатларнинг миллий мессенжерлардан фойдаланиш тажрибасини инобатга олиб амалга оширилиши зарур.

Комплекс функцияларга эга миллий мессенжерлар яратилиши орқали йилдан йилга ошиб бораётган ўзбек интернет фойдаланувчилари контингенти учун қулай, фойдали ва хавфсиз платформа пайдо бўлади, — деб ҳисоблайди вазирлик вакиллари.

Аввалроқ Ўзбекистонда миллий ижтимоий тармоқ яратишга бўлган 32 та уриниш қандай якунлангани ҳақда хабар берилганди.