O‘zbekiston Innovatsion rivojlanish vazirligi zamonaviy, xalqaro darajadagi hamda innovatsion ijtimoiy tarmoq yaratish maqsadida tanlov e’lon qildi. Bu haqda vazirlik matbuot xizmati xabar bermoqda.
“Milliy messenjer va ijtimoiy tarmoqlar bo‘yicha startap loyihalar” mavzusidagi “startap” loyihalar tanlovi uchun arizalar 2022-yil 31-iyuldan 1-oktabrgacha qabul qilinadi.
Startap loyihalarni qabul qilishda qo‘yiladigan shartlar quyidagicha:
- loyiha tashabbuskori–startap loyiha asoschilaridan bo‘lishi (kompaniya bo‘lgan taqdirda asosiy ulushdorlardan bo‘lishi) lozim;
- startap loyiha tashabbuskori (1 ta ishtirokchi) 1 ta loyiha bilan ishtirok etishi mumkin;
- loyihalar asosida tayyor mahsulot, dasturiy mahsulot, xizmatlar va texnologiyalar yaratishning hamda vazirlik tomonidan moliyalashtirishning eng ko‘p muddati 1 yildan oshmasligi lozim.
Startap loyihalar bir nechta mezonlar asosida baholanadi. Bundan loyihaning innovatsionligi, texnik jihatdan mukammalligi, moliyaviy va marketing rejalashtirish inobatga olinadi.
Bunda tashqari, loyiha jamoasining tegishli soha mutaxassislari bilan ta’minlanishi ham muhimdir.
Tanlovga taqdim etiladigan loyihalar messenjer.startap@gmail.com elektron pochtasiga quyidagilarni yuborish orqali qabul qilinadi.
- Startap loyiha muallifi tomonidan imzolangan ariza;
- Startap loyiha pasporti;
- Xarajatlar smetasi;
- Startap loyiha biznes matni (imzo va muhr qo‘yilgan holda);
- Startap loyiha taqdimoti yoki planshet shaklida loyiha mazmuni to‘liq yoritilganligi.
Taqdim etilgan loyihalar texnik ekspertizadan o‘tkaziladi.