O‘zbekistonda suyultirilgan gazni aholiga yetkazib berish samaradorligi oshiriladi
O‘zbekistonda suyultirilgan gazni tashish va aholiga yetkazib berish samaradorligi yangi bosqichga ko‘tariladi. Bu haqda “Hududgazta’minot”aksiyadorlik jamiyati matbuot xizmati xabar berdi.
Ta’kidlanishicha, mazkur masala Vazirlar Mahkamasining “Respublika iste’molchilarining tabiiy va suyultirilgan gaz ta’minoti tizimining samaradorligini oshirish chora-tadbirlari to‘g‘risida”gi qarorida nazarda tutilgan. Hujjatga muvofiq, “Hududgazta’minot” AJga tegishli vazirlik va idoralar bilan birgalikda aholini suyultirilgan gaz bilan ta’minlash tizimi samaradorligini oshirish bo‘yicha ko‘rsatmalar berilgan.
Hukumat qarorida belgilangan vazifalar aholini gaz bilan ta’minlash tizimida amalga oshirilayotgan islohotlarning mantiqiy davomi hisoblanadi. So‘nggi uch yilda iste’molchilarga suyultirilgan gaz yetkazib berish sohasi modernizatsiya qilindi. Jumladan, aholiga gaz ballonlarini “aylanma” usulda yetkazib berish yo‘lga qo‘yildi, avtotransport vositalari parki sezilarli darajada kengaytirildi, temiryo‘llar bo‘ylab yonilg‘i tashish uchun vagon-sisternalari sotib olindi.
Natijada 3,7 million xonadonga suyultirilgan gaz yetkazib berish muddati 46—50 kundan 30—40 kungacha qisqardi. Bundan tashqari, gaz ballonlarini maxsus shtrix-kodlar orqali iste’molchiga yetkazib berish bo‘yicha onlayn monitoring o‘rnatildi, yonilg‘i uchun o‘zaro hisob-kitoblar maxsus ID kartalar orqali naqd pulsiz shaklga o‘tkazildi, suyultirilgan gaz bilan ishlashning har bir bosqichida videokuzatuv kameralari o‘rnatilishi tufayli korrupsiya holatlari deyarli yo‘q qilindi.
Yil oxiriga qadar suyultirilgan gaz tashish hajmini 3,6 ming tonnagacha oshiradigan qo‘shimcha vagon-sisternalarni sotib olish, saqlash hajmini kengaytirish uchun gaz quyish shoxobchalariga 22 ta sig‘im o‘rnatish, shuningdek, suyultirilgan gaz sifatini nazorat qilish uchun mustaqil kimyoviy laboratoriyani jalb qilish rejalashtirilgan.
2024-yilga borib suyultirilgan gaz hajmining oylik fondini bosqichma-bosqich 56 ming tonnagacha oshirish, 69 ming dona gaz ballonlarini aholiga foydalanish uchun yetkazib berish, shuningdek, Isuzu markali 31 ta yuk tashuvchi avtomobil sotib olish hisobiga gaz ballonlarini tashishga mo‘ljallangan mavjud avtotransport parkini yanada kengaytirish rejalashtirilgan. Bularning barchasi xonadonlarga suyultirilgan gaz tashish hajmini oyiga o‘rtacha 1,9 tonnaga oshirishga xizmat qiladi.
