FIFA “Mash’al”ga nisbatan yana transfer taqiqini qo‘ydi

Muborakning “Mash’al” futbol klubiga nisbatan FIFA tomonidan transfer taqiqi qo‘yildi. Bu haqda PFL matbuot xizmati ma’lum qildi.

Qayd etilishicha, 2022-yilning 11-aprelida FIFA Nizolarni hal etish palatasi “Mash’al”ga nigeriyalik futbolchi Ifeanyi Ifeanyi oldigi qarzini 45 kun muddat ichida to‘lash majburiyatini yuklagan. Agar mazkur majburiyatlar klub tomonidan o‘z vaqtida bajarilishi ta’minlanmasa, klubga nisbatan milliy va xalqaro miqyosda yangi futbolchilarni ro‘yxatdan o‘tkazish bo‘yicha taqiq qo‘yilishi haqida ogohlantirish berilgan.

Klub bu muammoni hal etmagan va shu sabab FIFA muborakliklar klubiga nisbatan transfer taqiqi belgilagan.

Avvalroq “Mash’al” yana bir nigeriyalik futbolchi Ibe Mikel Okoro oldidagi qarzini to‘lamagani bois 30-maydan e’tiboran FIFA tomonidan transfer taqiqiga uchragandi. Keyinchalik klub muammoni hal qilgandan o‘ng ushbu taqiq olib tashlangandi.