Andijon viloyatida faoliyat yurituvchi hokimlar tomonidan chiqarilgan qarorlarning 30 tasi sudda haqiqiy emas deb topilgan. Bu haqda viloyat sudi mas’ullari bilan bo‘lib o‘tgan matbuot anjumanda ma’lum qildi, deya xabar berdi “Daryo” muxbiri.
Andijon viloyati Ma’muriy sudi raisi Mo‘ydinjon Salimovning ta’kidlashicha, viloyat hamda tumanlararo Ma’muriy sudlari tomonidan 2022-yilning olti oyi davomida jami 476 ta ommaviy-huquqiy munosabatlarga doir ish ko‘rib chiqilgan.
Shularning 332 tasi ommaviy-huquqiy munosabatlarga doir ish bo‘lib, o‘tgan yilning shu davriga nisbatan 17,3 foizga ko‘paygan. Sudda ko‘rilgan ishlarning 114 tasi qanoatlantirilgan, 161 tasi rad qilingan. 121 ta ariza ko‘rmasdan qoldirilgan, 36 ta ariza ish yuritishdan tugatilgan.
Jami ko‘rilgan ommaviy-huquqiy munosabatlarga doir ishlarning 102 ta ma’muriy ish sayyor sudda ko‘rilgan.
“Ko‘rilgan ishlar organlar kesimida tahlil qilinganda 163 tasi mahalliy hokimlik, 58 tasi soliq, 48 tasi kadastr, 21 tasi fuqarolik holati dalolatnomalarini yozish idoralari, 16 tasi majburiy ijro byurosi hamda 5 tasi budjetdan tashqari pensiya jamg‘armasining qarorlarini haqiqiy emas deb topish, harakat (harakatsizligi)ni qonunga xilof deb topish haqidagi ishlarni tashkil qiladi.
Toifalari kesimida tahlil qilinganda esa 297 tasi ma’muriy organlar, fuqarolar o‘zini o‘zi boshqarish organlarining va ular mansabdor shaxslarining qarorlari, harakatlari (harakatsizligi) yuzasidan, 1 tasi notarial harakatni amalga oshirish rad etilganligi yoxud notariusning mansabdor shaxsining harakatlari (harakatsizligi) yuzasidan, 17 tasi fuqarolik holati dalolatnomalarini yozishni ro‘yxatga olish rad etilganligi yoxud mansabdor shaxsining harakatlari (harakatsizligi) yuzasidan, 13 tasi davlat ro‘yxatidan o‘tkazishni rad etish ustidan shikoyat qilish to‘g‘risida, 1 tasi litsenziyasining amal qilish muddatini tugatish yuzasidan nizolashish bo‘yicha ishlar hisoblanadi”, — deydi Mo‘ydinjon Salimov.
Mo‘ydinjon Salimov mahalliy hokimliklarning qarorlarini haqiqiy emas hamda mansabdor shaxslarining harakatini (harakatsizligini) qonunga xilof deb topish holatlari 2022-yilda o‘tgan yilga nisbatan sezilarli darajada kamayganini qayd etgan.
Andijon tumanlararo ma’muriy sudi tomonidan hokim qarorlarini haqiqiy emas deb topish bilan bog‘liq 151 ta ish ko‘rilgan bo‘lib, shundan 30 tasi qanoatlantirilgan, 91 tasi rad qilinib, 14 tasi ish yuritishdan tugatilgan. Qolgan 16 tasi esa ko‘rmasdan qoldirilgan.Hududlar kesimida olganda eng ko‘p murojaat Andijon tumani hokimi qarori ustidan bo‘lgan. Shu tuman hokimining 7 ta qarori sudda haqiqiy emas deb topilgan.
Shuningdek, Baliqchi va Izboskan tumanlarida esa 3 tadan, Marhamat tumanida 2 ta, Asaka, Jalaquduq, Xo‘jaobod, Shahrixon va Qo‘rg‘ontepa tumanlarida esa bittadan tashkil etadi.
Ta’kidlash lozim, 2021-yilning olti oyida 112 ta mahalliy hokimlik qarorlari haqiqiy emas deb topilgan bo‘lsa, 2022-yilning olti oyida ushbu ko‘rsatkich 21 tani tashkil etgan. Bundan ko‘rinadiki ko‘rsatkich o‘tgan yilning shu davriga nisbatan ancha miqdorga kamaygan”, — deydi Mo‘ydinjon Salimov.
Izoh (0)