Андижон вилоятида фаолият юритувчи ҳокимлар томонидан чиқарилган қарорларнинг 30 таси судда ҳақиқий эмас деб топилган. Бу ҳақда вилоят суди масъуллари билан бўлиб ўтган матбуот анжуманда маълум қилди, дея хабар берди «Дарё» мухбири.
Андижон вилояти Маъмурий суди раиси Мўйдинжон Салимовнинг таъкидлашича, вилоят ҳамда туманлараро Маъмурий судлари томонидан 2022 йилнинг олти ойи давомида жами 476 та оммавий-ҳуқуқий муносабатларга доир иш кўриб чиқилган.
Шуларнинг 332 таси оммавий-ҳуқуқий муносабатларга доир иш бўлиб, ўтган йилнинг шу даврига нисбатан 17,3 фоизга кўпайган. Судда кўрилган ишларнинг 114 таси қаноатлантирилган, 161 таси рад қилинган. 121 та ариза кўрмасдан қолдирилган, 36 та ариза иш юритишдан тугатилган.
Жами кўрилган оммавий-ҳуқуқий муносабатларга доир ишларнинг 102 та маъмурий иш сайёр судда кўрилган.
«Кўрилган ишлар органлар кесимида таҳлил қилинганда 163 таси маҳаллий ҳокимлик, 58 таси солиқ, 48 таси кадастр, 21 таси фуқаролик ҳолати далолатномаларини ёзиш идоралари, 16 таси мажбурий ижро бюроси ҳамда 5 таси бюджетдан ташқари пенсия жамғармасининг қарорларини ҳақиқий эмас деб топиш, ҳаракат (ҳаракатсизлиги)ни қонунга хилоф деб топиш ҳақидаги ишларни ташкил қилади.
Тоифалари кесимида таҳлил қилинганда эса 297 таси маъмурий органлар, фуқаролар ўзини ўзи бошқариш органларининг ва улар мансабдор шахсларининг қарорлари, ҳаракатлари (ҳаракатсизлиги) юзасидан, 1 таси нотариал ҳаракатни амалга ошириш рад этилганлиги ёхуд нотариуснинг мансабдор шахсининг ҳаракатлари (ҳаракатсизлиги) юзасидан, 17 таси фуқаролик ҳолати далолатномаларини ёзишни рўйхатга олиш рад этилганлиги ёхуд мансабдор шахсининг ҳаракатлари (ҳаракатсизлиги) юзасидан, 13 таси давлат рўйхатидан ўтказишни рад этиш устидан шикоят қилиш тўғрисида, 1 таси лицензиясининг амал қилиш муддатини тугатиш юзасидан низолашиш бўйича ишлар ҳисобланади», — дейди Мўйдинжон Салимов.
Мўйдинжон Салимов маҳаллий ҳокимликларнинг қарорларини ҳақиқий эмас ҳамда мансабдор шахсларининг ҳаракатини (ҳаракатсизлигини) қонунга хилоф деб топиш ҳолатлари 2022 йилда ўтган йилга нисбатан сезиларли даражада камайганини қайд этган.
Андижон туманлараро маъмурий суди томонидан ҳоким қарорларини ҳақиқий эмас деб топиш билан боғлиқ 151 та иш кўрилган бўлиб, шундан 30 таси қаноатлантирилган, 91 таси рад қилиниб, 14 таси иш юритишдан тугатилган. Қолган 16 таси эса кўрмасдан қолдирилган.Ҳудудлар кесимида олганда энг кўп мурожаат Андижон тумани ҳокими қарори устидан бўлган. Шу туман ҳокимининг 7 та қарори судда ҳақиқий эмас деб топилган.
Шунингдек, Балиқчи ва Избоскан туманларида эса 3 тадан, Марҳамат туманида 2 та, Асака, Жалақудуқ, Хўжаобод, Шаҳрихон ва Қўрғонтепа туманларида эса биттадан ташкил этади.
Таъкидлаш лозим, 2021 йилнинг олти ойида 112 та маҳаллий ҳокимлик қарорлари ҳақиқий эмас деб топилган бўлса, 2022 йилнинг олти ойида ушбу кўрсаткич 21 тани ташкил этган. Бундан кўринадики кўрсаткич ўтган йилнинг шу даврига нисбатан анча миқдорга камайган», — дейди Мўйдинжон Салимов.
Изоҳ (0)