Xitoy harbiy mashg‘ulotlar doirasida Tayvan bo‘g‘ozidagi nishonlarga zarbalar berdi

Xitoy Xalq ozodlik armiyasi harbiy mashg‘ulotlar doirasida Tayvan yaqinida jangovar otishmalarni amalga oshirdi, deb yozadi “RBK”.

“4-avgust kuni 13:00 (Toshkent vaqti bilan 10:00) atrofida Tanvan bo‘g‘ozida uzoq masofalarga jangovar o‘qlar otildi va Tayvan bo‘g‘ozining sharqiy qismida belgilangan nishonlarga aniq zarbalar berildi, kutilgan natijalarga erishildi”, — deyiladi Jangovar qo‘mondonlik sharqiy zonasi xabarida.

Xitoy Tayvan yaqinidagi harbiy mashg‘ulotlarni 4-avgust kuni boshladi. Ular 7-avgustga qadar davom etadi. Mashqlar doirasida orol yaqinidagi suv va havo hududlarida jangovar o‘q uzishlar bo‘lib o‘tadi. Tayvan bu manyovrlarni “navbatdagi provokatsiya” va mintaqadagi joriy vaziyatni o‘zgartirishga urinish deb hisoblaydi.

Xitoyning katta ko‘lamli harbiy mashg‘ulotlari AQSH Vakillar palatasi spikeri Nensi Pelosining Tayvanga tashrifiga javob bo‘ldi. Pelosi orolda bir sutkadan kamroq vaqt davomida bo‘lib turdi. U yerda mahalliy ma’muriyat rahbari Say Inven bilan uchrashdi, so‘ng Janubiy Koreyaga uchib ketdi. Bu AQSH Vakillar palatasi spikerining Tayvanga 1997-yildan buyon birinchi tashrifi bo‘ldi.

2-avgust kuni Tayvanga AQSH vakillar palatasi spikeri Nensi Pelosi Osiyo turnesi doirasida yetib keldi; tashrif Xitoy rahbariyati tomonidan keskin tanqidga sabab bo‘ldi, uni provokatsiya deb atashdi. Oq uy esa Pelosining tashrifi AQSHning Xitoyga nisbatan siyosatida qandaydir o‘zgarish bo‘lganini anglatmasligiga ishontirdi.

O‘zining Osiyo turnesi haqida e’lon qilayotib, Pelosi Tayvanni manzillardan biri sifatida tilga olmagan edi. Orolga kelganidan keyin Pelosi bu yerga tashrifidan maqsad “yorqin va dinamik” demokratiyani qo‘llab-quvvatlash va AQSHning Tayvanni qo‘llab-quvvatlash niyatini tasdiqlash bo‘lganini aytdi.