Tayvanning Germaniyadagi elchisi Bundestag delegatsiyasini orolga taklif qildi

Tayvanning Germaniyadagi vakili Se Chjivey Xitoy materigi va Tayvan hukumatlari o‘rtasidagi keskinlik fonida Bundestag (Germaniya parlamenti) delegatsiyasini orolga tashrif buyurishga taklif qildi. Bu haqda u Germaniyaning Der Tagesspiegel gazetasiga bergan intervyusida aytgan.

“Men parlament spikeri Berbel Bass boshchiligidagi Bundestag delegatsiyasining Tayvanga borishini taklif qilaman. Bu parlament fraksiyalaridan emas, balki Bundestagdan — xalq vakili bo‘lgan va hukumatga bo‘ysunmaydigan mustaqil qonun chiqaruvchi davlat organidan tashabbus sifatida qabul qilinadi”, — dedi diplomat.

Shu bilan birga, u hozirgi vaziyat “1996-yildan buyon harbiy to‘qnashuv uchun eng katta turtki” bo‘lishi mumkinligini qo‘shimcha qildi. Se Chjiveyning so‘zlariga ko‘ra, Tayvanga istalgan xorijiy davlatning istalgan nufuzli shaxslari tashrif buyurishiga qarshi Xitoy taqiqlariga chek qo‘yish zarur.

Xitoy va Tayvan o‘rtasidagi keskinlik so‘nggi haftalarda AQSH Vakillar palatasi spikeri Nensi Pelosining orolga tashrifi tufayli kuchaygan. 2-avgust kuni Pelosining maxsus reysi Pekinning e’tirozlariga qaramay Tayvanga qo‘ndi. Samolyotdan tushgach, AQSH Kongressi Vakillar palatasi spikeri Amerika delegatsiyasining asosiy maqsadi Tayvanning “yorqin va dinamik” demokratiyasini qo‘llab-quvvatlash ekanini aytdi. 3-avgust kuni siyosatchi mamlakatni tark etdi.

Spikerning tashrifiga javoban Xitoy keskin norozilik bildirdi va Pelosining safari “Xitoy—AQSH munosabatlarini buzishini” ta’kidladi.