AQSH Vakillar palatasi spikeri Nensi Pelosining Tayvanga tashrifi fonida Xitoy tomonidan e’lon qilingan o‘quv mashg‘ulotlari tufayli orol harbiylari jangovar shaylik darajasini oshirdi, deb yozadi “RBK” Tayvan Vazirlar mahkamasiga tayanib.
Qisman tan olingan davlat hukumati xavfsizlik va barqarorlikni ta’minlash bo‘yicha choralarni ishlab chiqishga va’da berdi va fuqarolarni o‘zlarini xavfsiz deb his qilishi mumkinligiga ishontirdi.
Tayvan Mudofaa vazirligi Xitoyning orol atrofida o‘q otishlar bilan mashg‘ulotlar o‘tkazish rejalarini qoraladi va Pekin “muammoni tinch yo‘llar bilan emas, balki kuch bilan hal qilishga intilayotgani”ni ma’lum qildi. Idora Xitoyning xatti-harakatlarini oroldagi yirik portlar uchun xavf yaratish va “bir tomonlama tartibda mintaqadagi tinchlik va barqarorlikka putur yetkazish”ga urinish deb hisoblaydi. Vazirlik, shuningdek, Xitoy o‘z manyovrlari bilan orolning havo va dengiz hududlarini to‘sib qo‘yayotganini bildirdi; ularning ishonch bildirishicha, Pekinning xatti-harakatlari BMT qoidalariga ziddir.
Pelosining samolyoti Taybey aeroportiga qo‘nganidan keyin Xitoy orol yaqinida o‘t ochishlar orqali harbiy mashg‘ulotlar boshladi. Bundan tashqari, Tayvandan shimolda, janubi-g‘arbda va janubi-sharqda suv va havo hududida ham mashqlar tashkil qilinadi. Vakillar palatasi spikerining tashrifidan avval ham Xitoy hukumati mamlakat qo‘shinlari “qo‘l qovushtirib o‘tirmasligi”ga va’da bergan edi. Pekin iqtisodiy choralar ham ko‘rdi: 3-avgustdan hukumat Tayvanga tabiiy qum yetkazib berishni to‘xtatdi va oroldan sitrus mevalar, ikki xildagi baliq mahsulotlari importini taqiqladi.
Pekin 1949-yilda Xitoydan mustaqil bo‘lib ajralib chiqqanini e’lon qilgan orolni o‘z hududi deb hisoblaydi. Xitoy hukumati Pelosining tashrifini keskin tanqid qilib, Pelosi ataylab provokatsiya uyushtirgani va “yagona Xitoy” tamoyilini buzganini ma’lum qildi.
Xitoy Tashqi ishlar vazirligi AQSH “o‘t bilan o‘ynashayotgani”ni ma’lum qildi. Vazirlik fikricha, Vashingtonning xatti-harakatlari “Xitoy suvereniteti va hududiy yaxlitligini jiddiy ravishda buzib, Tayvanda tinchlik va barqarorlikka putur yetkazgan”.
Izoh (0)