1-avgust kuni ertalab Ukraina doni bilan Syerra-Leone bayrog‘i ostida Odessa portidan jo‘nab ketgan Razoni yuk kemasi Istanbulga yetib keldi. Bu haqda Turkiya mudofaa vazirligi ma’lum qildi, deya xabar bermoqda Euronews.

Makkajo‘xori ortilgan kema Qora dengizdan Bosfor bo‘g‘oziga yetib kelgan va belgilangan joyga langar tashlagan. Kema tekshiruvdan o‘tkazilmoqda.

Urush boshlanganidan buyon ilk bor Razoni yuk kemasi “don yo‘lagi”ni muvaffaqiyatli kesib o‘tdi. U Bosfordan o‘tib, Tripoli (Livan) portiga yo‘l oladi. Kema bortida Ukrainadan 26 ming tonna makkajo‘xori olib ketmoqda, Odessa portida oziq-ovqat yuklangan yana 16 ta kema dengizga chiqishni kutmoqda.

Avvalroq Turkiya Mudofaa vazirligi hozirda Ukrainaning uchta porti don ortilgan kemalarni dengizga chiqarishga tayyorlanayotgani haqida xabar bergan edi. Vazirlikning ta’kidlashicha, Qo‘shma muvofiqlashtirish markazi yuk kemasining yo‘nalish bo‘ylab o‘tishini onlayn rejimida kuzatib boradi.