“Sharja” klubi va O‘zbekiston milliy terma jamoasi yarim himoyachisi Otabek Shukurov faoliyatini Turkiya chempionatida davom ettiradi.

26 yoshli futbolchi Istanbulning “Fotih Karagyumryuk” jamoasi safiga borib qo‘shildi. Turk klubi futbolchining transfer huquqini to‘liq sotib olgan, biroq kelishuvning moliyaviy tafsilotlari ma’lum emas.

Avvalroq “Sharja” Shukurov jamoadan ketishini ma’lum qilgandi.

“Fotih Karagyumryuk” jamoasiga italiyalik mutaxassis Andrea Pirlo murabbiylik qiladi. Klub 2021/22-yilgi mavsumni 8-o‘rinda yakunlagandi.

Shukurov 2017-yildan buyon sharjaliklar safida to‘p surib kelayotgandi. Unga qadar Otabek “Mash’al”, “Buxoro” va “Bunyodkor” jamoalari libosini himoya qilgan.