“Daryo” tahririyatiga kelib tushgan ma’lumotga ko‘ra, “Ahmadboy” voqeasida ayblanib, qamoq jazosini o‘tab qaytgan shaxs yana firibgarlik qilgani uchun qamoqqa olingan. U o‘zgalarning mol-mulki va mablag‘larini olib, bir yil davomida ikki baravar qilib qaytarish sharti bilan o‘zlashtirib kelgan. Ushbu holatga aniqlik kiritish maqsadida “Daryo” muxbiri Toshkent viloyati ichki ishlar bosh boshqarmasi axborot xizmati bilan bog‘landi.
Boshqarmaning axborot berishicha, haqiqatan ham xavfli retsidivist N.B. Toshkent viloyatining Chinoz tumanida fevral oyida o‘tkazilgan tezkor tadbirda firibgarlik yo‘li bilan pul mablag‘ini olayotgan vaqtda ushlangan.
U arizachining Spark avtomashinasini 6 ming 500 dollarga baholab, qo‘shimcha 2 ming dollar olishga kelishgan. Umumiy miqdorda 8 ming 500 dollarni 10 oy davomida har oydan 1 ming 700 dollardan, jami 17 ming dollar miqdorida qaytarib berishni va’da qilgan.
Ayblanuvchi N.B. Chinoz tumanida joylashgan avtomashinalarga yonilg‘i quyish shoxobchasi yonida arizachidan Spark avtomashinasi hujjatlari hamda 2 ming dollarni olgan vaqtda ashyoviy dalillar bilan ushlangan.
Tergov harakatlari davomida N.B o‘z ko‘rsatmasida 2021-yilning dekabr oyida ozodlikka chiqqanidan so‘ng shu kungacha 10 nafardan ortiq fuqaroning avtomashina, chorva mollari va naqd pullarini ma’lum muddatda tan narxidan ko‘paytirib berish sharti bilan olganligini ma’lum qilgan.
N.B.ga nisbatan Jinoyat kodeksining 25,168-moddasi 3-qismi “a,b” (firibgarlik – ko‘p miqdorda, takroran yoki xavfli retsidivist tomonidan) va 4-qismi “a” bandi (juda ko‘p miqdorda) bilan ayblanuvchi tariqasida ishga jalb qilingan. Ayblanuvchiga nisbatan qamoqqa olish tarzidagi ehtiyot chorasi qo‘llangan.
Jinoyat ishi bo‘yicha ayblanuvchi N.B. fuqarolardan jami 1 milliard so‘mlik qoramol, avtomashinalarni firibgarlik yo‘li bilan qo‘lga kiritganligi aniqlangan. Ushbu fuqarolar jinoyat ishi bo‘yicha jabrlanuvchi va fuqaroviy da’vogar deb e’tirof etilgan.
Mazkur jinoyat ishi Jinoyat ishlari bo‘yicha Chinoz tuman sudiga yuborilgan.
Ma’lumot uchun, “Ahmadboy vasvasasi” — O‘zbekistondagi eng shov-shuvli moliyaviy piramida asoschisi Ahmadjon Tursunboyev faoliyati xronologiyasi e’lon qilingan edi.
Unda O‘zbekistondagi eng shov-shuvli moliyaviy piramida asoschisi Ahmadjon Tursunboyev haqida eshitmagan odam bo‘lmasa kerak. “Chinozlik Ahmadboy” nomi bilan mashhur ishbilarmonning “to‘ri”ga ilinib, chuv tushgan fuqarolar ham mingdan ko‘p. Uning 2006-yilda boshlangan noqonuniy faoliyati o‘n yildan keyin — 2016-yilning yozida fosh bo‘ladi. “Daryo” hozirda jazo muddatini o‘tayotgan Ahmadboyning “tadbirkorlik” ishi bilan bog‘liq barcha tafsilotlarni bir sahifaga jamlangan.
Izoh (0)