“Paxtakor” jamoasining yangi bosh murabbiyi Maksim Shatskix ilk bor matbuot anjumanida ishtirok etdi va bir qator savollarga javob berdi.
Superliga haqidaEslatib o‘tamiz, 6-iyul kuni “Paxtakor” Slavche Voyneski bilan shartnomani bekor qildi. 15-iyul kuni esa “sherlar” Maksim Shatskixni jamoaning yangi bosh murabbiyi sifatida tanishtirdi.Chempionat darajasi xalqaro maydon orqali belgilanadi. Lekin raqobat jiddiy kechmoqda. Chempionlik uchun kurashadigan jamoalar ko‘paygan. Demak, hammasi to‘g‘ri yo‘lda ketmoqda. Umuman olganda, har yili chempionatni kuzatib kelganman va hammasi joyida deb o‘ylayman.
Bosh murabbiylik taklifini o‘ylab o‘tirmasdan qabul qilgani haqida
Klubga sport direktori sifatida kelgandim. Bu men uchun yangi ish, yangi yo‘l edi. Keyinroq “Paxtakor” Voyneski bilan xayrlashdi va meni bosh murabbiylikka taklif etdi. Bolalikdan shu yerda o‘ynaganim bois taklifga rozilik berdim. Chet elga aynan “Paxtakor”dan yo‘l olganman. Bunday taklif ustida o‘ylanib o‘tirilmaydi.
Klubdagi raqobat haqida
Iloji boricha har bir chiziqni kuchaytirish lozim, chunki raqobat bo‘lishi kerak. Raqobat bo‘lmasa, o‘sish bo‘lmaydi. Har bir pozitsiyada ikki nafardan futbolchi bo‘lishi kerak. Shunda rivojlanish bo‘ladi va futbolchilar ham borini berib o‘ynaydi. Agar raqobat bo‘lmasa, ruhiy jihatdan qiyinchilik yuzaga keladi. Yana xaridlar bo‘ladi, albatta. Bizda yuqori darajali futbolchilar bo‘lishi kerak.
“Paxtakor”dek klub har bir futbolchisi bilan har yili shartnomani 1 yilga uzaytiraverishi yarashmaydi. Biz kamida 2 yoki 3 yillik kelishuvni rasmiylashtirishni yo‘lga qo‘ymoqdamiz.
“Eski maktab” va zamonaviy futbol borasida
Hozir boshqa avlod o‘ynamoqda. Men Lobanovskiy davrida o‘ynagan futbol bo‘lmaydi. Chunki futbol ham boshqa yo‘nalishda rivojlanib ketdi. Hozir oldingidek og‘ir yuklamalar berilmaydi. Ilgari avlod boshqa edi, ekologiya boshqacha edi. Hozirgi kunda futbolchi har qanday pozitsiyada o‘ynashga moslashishi kerak.
Tan olish kerak, ekologik vaziyat va ovqatlanish tartibi o‘zgarib ketdi. Katta shaharlarda mashinalar ko‘p bo‘ladi. Bu ham katta muammo va hamma joyni muammosi. Shu va boshqa sabablar xohlaysizmi-yo‘qmi, albatta, ta’sir ko‘rsatadi. Futbol atrofidagi infratuzilma ham o‘zgargan. Hozir futbolchi mashg‘ulotga keladi, unga hamma narsa muhayyo etiladi, biz o‘ynagan davrda bunday emasdi. Biroq bunga sekin-asta moslashib boramiz. Bizda yaxshi futbolchilar yig‘ilgan, jamoamiz juda ahil.
Muxlislar haqida
Haqiqiy muxlislar hamisha siz bilan birga bo‘lishadi. Hech bir murabbiy har doim g‘alaba qozonmaydi. Mag‘lubiyatsiz g‘alaba ham bo‘lmaydi. Muxlislarga kelsak, bundan cho‘chimayman. Rahbariyat va muxlislar faqat g‘alabani kutishlarini bilaman. Agar nazorat qo‘limdan chiqib ketsa, jamoada bo‘lmayman, bu aniq. Muxlislar shunchaki ishdan tashqari, 2 soatga kelib, jamoani qo‘llab-quvvatlab tursa, hammasi zo‘r bo‘ladi. Ularga yoqadigan va zavq oladigan futbol ko‘rsatishga intilamiz.
Yangi futbolchilar haqida
Hamma narsaning o‘z vaqti bo‘ladi. Yangi futbolchilarni ochiqlay olmayman, to‘g‘ri tushuning. Lekin tez orada bilib olasiz.
“Paxtakor” futbolchilarining terma jamoaga jalb qilinishi haqida
Men “Paxtakor” bosh murabbiyiman. Terma jamoa haqida o‘ylayotganim yo‘q. Albatta, ular uchun qayg‘uraman. Menda hozir termaga nisbatan bitta kichik e’tiroz bor: bilasiz, “Paxtakor” O‘zbekiston terma jamoasi asosini tashkil qiladi. Shunday ekan FIFA kunlaridan tashqari boshqa paytda futbolchilarimizni bezovta qilmasliklarini xohlagan bo‘lardim.
Maksim Shatskix, “Paxtakor” bosh murabbiyi
Izoh (0)