Германия 2022 йилнинг 1 августдан Россия кўмирини, 31 декабридан эса Россия нефтини сотиб олишни тўхтатади. Бу ҳақда Германия молия вазири ўринбосари Ёрг Кукис Сиднейдаги анжуманда маълум қилди, деб хабар бермоқда Reuters.
Кукиснинг сўзларига кўра, Германияда кўмир импортининг ҳам, нефть импортининг ҳам 40 фоизи Россия ҳиссасига тўғри келаётган эди.
«Совет империясининг Шарқий Европадаги қуроли бўлган ‘Дўстлик’ нефть қувури тарихидан хабардор ҳар бир киши биладики, бу қарамликдан халос бўлиш арзимаган масала эмас, бироқ биз бунга бир неча ой ичида эришамиз», — дейди Кукис.
Европа Иттифоқи апрель ойи бошида санкцияларнинг бешинчи пакети доирасида Россиядан кўмир импортини бутунлай тақиқлашга рози бўлган эди. Тақиқ 10 августдан кучга киради.
Олтинчи санкциялар пакети доирасида май ойи охирида ЕИ давлатлари томонидан Россия нефтини етказиб беришни қисман тақиқлаш ҳақида келишиб олинган. Эмбарго денгиз орқали нефть етказиб беришга тааллуқлидир (Германия ва Польша эса «Дўстлик» қувури орқали нефть сотиб олишни тўхтатади) ва 2022 йил охиридан кучга киради.
Май ойида Германия канцлери Олаф Шольц Россиядан кўмир импорт қилиш ёзда, нефть импорт қилиш эса йил охиригача тўхтатилишини айтган, бироқ аниқ саналарни айтмаган эди.
Изоҳ (0)