Buxoroda o‘zganing nomida bo‘lgan yer maydonini noqonuniy sotishga uringan shaxslar ushlandi. Bu haqda “Daryo”ga viloyat IIB axborot xizmati xabar berdi.
Ta’kidlanishicha, Shofirkon tumanida yashovchi fuqaro H.R. qo‘shni qishloqdagi tanishi R.Sh.ga tumandagi “Tezguzar” mahalla fuqarolar yig‘ini hududidagi tomorqa xo‘jaligi uchun boshqa bir fuqaroga ajratilgan 16 sotix yer maydonini sotishga uringan. Ushbu yerni fuqaroning uy-joy qurishi uchun rasmiylashtirib berishi evaziga undan 10 ming dollar pul so‘ragan. Yer sotuvchi tadbir paytida qo‘lga olingan.“Shuningdek, Buxoro shahrida yashovchi X.J. boshqa bir fuqaro J.I.ning ishonchiga kirib, noqonuniy ravishda yer sotayotgani yuzasidan xabar kelib tushdi. U tanishiga shaharning Alpomish ko‘chasida joylashgan 10 sotixli bo‘sh yer maydonini 35 ming dollarga firibgarlik yo‘li bilan sotayotganda qo‘lga olindi”, — dedi viloyat IIB axborot xizmati rahbari Shuhrat Jalolov.
Qo‘shimcha qilinishicha, har ikki holat yuzasidan ushbu fuqarolarga nisbatan Jinoyat kodeksining 168-moddasi (firibgarlik) va 28-moddasi (jinoyat ishtirokchilarining turlari), 211-moddasi (pora berish) bilan jinoyat ishlari qo‘zg‘atilib, dastlabki tergov harakatlari olib borilmoqda.
Izoh (0)