Buyuk Britaniya bosh vaziri Boris Jonson hukumatida Moliya vaziri Rishi Sunak hamda sog‘liqni saqlash vaziri Sajid Javid iste’fo berdi. Bu Jonson bilan bir partiyadan bo‘lgan Kristofer Pincher bilan bog‘liq mojaro sabab yuz bergan.
Javid bundan buyog‘iga vazirlik vakolati doirasidagi ishlarni vijdonan bajara olishiga shubha uyg‘onganini ma’lum qildi. Oradan hech qancha vaqt o‘tmay Sunakning ham iste’fo bergani oydinlashdi.
“Jamoatchilik hukumat ishining belgilangan tartibda ketishini kutadi va bu adolatli, jiddiy va haqiqatga mos. Ehtimol men ushbu lavozim mening vazir sifatidagi oxirgi rahbarlik ishim ekanini tan olayotgandirman, lekin mazkur standartlar uchun kurashish zarurligini yaxshi tushundim, shuning uchun ham iste’foga chiqyapman”,— deya yozgan Rishi Sunak Twitter’da (Reuters iqtibosi).
Shuningdek, Konservativ partiya raisining o‘rinbosari Bim Afolami ham iste’fo berganini e’lon qilgan.
Avvalroq Boris Jonson Pincherning nomaqbul harakatlari va hukumatda ishlashga noloyiqligini tushunmagani uchun kechirim so‘ragandi.
“Ortga qarab bu noto‘g‘ri qaror bo‘lganini tushundim. Faoliyatiga, hayotiga mazkur qarorim bilan salbiy ta’sir ko‘rsatgan hammadan uzr so‘rayman”,— degan Buyuk Britaniya bosh vaziri Pincher bilan bog‘liq mojaroga izoh berish vaqtida.
Kristofer Pincher Konservatorlar partiyasida tartib-intizomga mas’ul bo‘lgan amaldorlardan edi, u hukumatdan ketgach juda ko‘p ichgani, uyatga qolgani va odamlar ishonchini oqlay olmaganini bayon etgan.
Izoh (0)