2018-yilda Megan Markl shahzoda Garriga turmushga chiqadi — shu tariqa Britaniya qirollik oilasiga professional aktrisa kirib keladi. Ammo ma’lum bo‘lishicha, u kino olamida ishtirok etgan yagona monarx emas: Vindzorlar ba’zan ko‘ngilochar shoularda va badiiy filmlarda ishtirok etib turadi.
Qirolicha Yelizaveta II
2012-yilda London Olimpiadasining ochilish marosimida tomoshabinlar Jeyms Bond rolini o‘ynagan Deniel Kreyg Yelizaveta II ni vertolyotgacha kuzatib borayotgani, mashhur josus va hazrati oliyalari parashyutda birgalikda sakrayotgan video namoyish etildi. Qirolichaning filmda ishtirok etishi uning oilasidan sir tutilgan, biroq qirolichaga sevimli korgi iti hamroh bo‘lgan. Natijada Yelizaveta II kinoga qo‘shgan hissasi uchun BAFTA mukofotiga sazovor bo‘ldi.
Ammo qirolichaning kinodagi faoliyati shu bilan tugamadi. Yaqinda hazrati oliyalarining platina yubileyiga bag‘ishlangan tizerda ham rol o‘ynadi. Filmdagi partnyori ayiqcha Paddington edi. Qirolicha va uning mehmoni choy ichib, marmeladli sendvichlar haqida gaplashishadi. Malika ayiqchaga har doim sumkasida shunday sendvich olib yurishini aytadi.
Shahzoda Charlz
Britaniyaning “Toj kiydirish” teleseriali 1960-yildan beri hanuz ekranlarda. Serialda taxt vorisi shahzoda Charlz ham rol o‘ynagan. Shahzoda shouning 40 yilligini nishonlash uchun 2000-yil 8-dekabrda jonli efirga uzatilgan epizodda qisqacha chiqish qilgan.
2022-yil mart oyida Charlz va uning rafiqasi Kamilla Parker-Boulz qirolichaning platina yubileyini nishonlash sahnasida “Ist-End aholisi” filmida suratga tushdi.
Shahzoda Uilyam va Garri
Uilyam va Garri afsonaviy “Yulduzlar jangi” kosmik epopeyasida qirollik jangchilari rolini o‘ynagan. Ular “So‘nggi Jedai” sahnasida kichik epizodda suratga tushgan, ammo ular ishtirok etgan kadr filmdan kesilgan. Gap shundaki, shahzodalarning bo‘yi jangchilar uchun juda balandlik qilgan.
Sara Fergyuson
Qirolichaning o‘g‘li — shahzoda Endryuning sobiq rafiqasi “Do‘stlar” sitkomining 4-mavsum finalida epizodik rol o‘ynagan. Sujetga ko‘ra, Jo uni London markazida uchratib qoladi va u bilan selfi tushadi. “Do‘stlar” tufayli Sara shahzoda bilan ajrashishini kechira olmagan britaniyaliklar oldida o‘z imijini yaxshilab olgan.
Malika Beatris
Saraning qizlaridan biri malika Beatris ham onasi kabi rol o‘ynagan. Qiz “Yosh Viktoriya” filmida katta buvisining xizmatkori rolini o‘ynaydi. Qirolicha rolini Emili Blant ijro etgan. Ko‘pgina tomoshabinlar malikaning tashqi ko‘rinishi Viktoriyaga juda o‘xshashligini ta’kidlaydi. Kartina prodyuserlaridan biri Sara Fergyuson bo‘lgan.
Shahzodalar — Edvard va Endryu hamda malika Anna
1987-yil iyun oyida Buyuk Britaniya ekranlarida The Grand Knockout Tournament shousi chiqdi, unda qirolichaning kichik farzandlari — shahzoda Edvard va Endryu hamda malika Anna ishtirok etadi. Ishtirokchilar ko‘plab sinovlardan o‘tish kerak bo‘ladi. Misol uchun, bir turda ular bahaybat sabzavotlarga o‘xshab kiyinishgan, boshqasida esa bir-biriga sun’iy go‘sht otishgan. Musobaqada Annaning jamoasi g‘alaba qozonadi. Mazkur shou xayriya uchun 1 million funt sterlingdan ko‘proq pul yig‘adi.
Zara Tindall
Malika Annaning qizi Zara Tindall Britaniya qirollik oilasining eng sermahsul aktrisalaridan biridir. U uchta filmda o‘ynagan: “Kontuziya”, “Qora va oq aro” va “Yashash huquqi”. Shuningdek, u hujjatli filmlar rejissori va saundtreklar muallifi hisoblanadi.
Izoh (0)