“Ozodlik” radiosi bilan hamkorlik qilish uchun shartlarimizni aytdik — Senat raisi Tanzila Norboyeva

O‘zbekiston “Ozodlik” radiosi bilan hamkorlik qilishga tayyor. Bu haqda Senat raisi Tanzila Norboyeva “Amerika ovozi” jurnalisti Navbahor Imomova bilan suhbatda ma’lum qildi.

Tanzila Norboyeva jurnalistning “O‘zbekiston ‘Ozodlik’ radiosiga ochiladimi?”, — degan savoliga javoban, yaqinda radioning prezidenti bilan uchrashgani va hamkorlik shartlarini aytganini ta’kidladi.

“Biz ‘Ozodlik’ bilan hamkorlik qilishga tayyormiz. Sizlarning rahbaringiz keldi va u bilan uzoq muloqot qildik. Ular nafaqat men bilan, balki boshqa idoralar rahbarlari bilan ham uchrashdi. Biz bilan ishlashga katta xohishi borligini bayon qildi. Biz beriladigan axborotlar obyektiv, tekshirilgan bo‘lishi kerakligini aytdik. Intervyular olish mumkinligi haqida so‘rashdi. Marhamat, “Ozodlik”ka hamma intervyu beradi – rahbarlarimiz ham, oddiy fuqarolar ham. Bu yerda hech qanaqa yopiqlik yo‘q. Hozir “Ozodlik” va O‘zbekiston o‘rtasida qandaydir bir ishonchsizlik bor. Agar bir-birimizga bo‘lgan ishonch, ya’ni O‘zbekiston va “Ozodlik” o‘rtasidagi ishonch yana tiklansa, albatta, jamiyatimizda bemalol faoliyat ko‘rsatsa bo‘ladi. Bu ishonchni tiklashga harakat boshlangan deb o‘ylayman” – dedi Senat rasmiysi.

Avvalroq Tanzila Norboyeva “Amerika ovozi” muxbiri bilan suhbatda O‘zbekistonda jamoatchilik tomonidan ijtimoiy tarmoqlarda bildirilayotgan fikrlar muxolifat hisoblanishini aytgandi.