Ўзбекистон «Озодлик» радиоси билан ҳамкорлик қилишга тайёр. Бу ҳақда Сенат раиси Танзила Норбоева «Америка овози» журналисти Навбаҳор Имомова билан суҳбатда маълум қилди.
Танзила Норбоева журналистнинг «Ўзбекистон ‘Озодлик’ радиосига очиладими?», — деган саволига жавобан, яқинда радионинг президенти билан учрашгани ва ҳамкорлик шартларини айтганини таъкидлади.
«Биз ‘Озодлик’ билан ҳамкорлик қилишга тайёрмиз. Сизларнинг раҳбарингиз келди ва у билан узоқ мулоқот қилдик. Улар нафақат мен билан, балки бошқа идоралар раҳбарлари билан ҳам учрашди. Биз билан ишлашга катта хоҳиши борлигини баён қилди. Биз бериладиган ахборотлар объектив, текширилган бўлиши кераклигини айтдик. Интервьюлар олиш мумкинлиги ҳақида сўрашди. Марҳамат, «Озодлик»ка ҳамма интервью беради – раҳбарларимиз ҳам, оддий фуқаролар ҳам. Бу ерда ҳеч қанақа ёпиқлик йўқ. Ҳозир «Озодлик» ва Ўзбекистон ўртасида қандайдир бир ишончсизлик бор. Агар бир-биримизга бўлган ишонч, яъни Ўзбекистон ва «Озодлик» ўртасидаги ишонч яна тикланса, албатта, жамиятимизда бемалол фаолият кўрсаца бўлади. Бу ишончни тиклашга ҳаракат бошланган деб ўйлайман» – деди Сенат расмийси.
Аввалроқ Танзила Норбоева «Америка овози» мухбири билан суҳбатда Ўзбекистонда жамоатчилик томонидан ижтимоий тармоқларда билдирилаётган фикрлар мухолифат ҳисобланишини айтганди.
Изоҳ (0)