Oliy Majlis Senati raisi Tanzila Norboyeva boshchiligidagi parlament delegatsiyasi rasmiy tashrif bilan Ozarbayjonda bo‘lib turibdi. 29-iyun kuni tashrif doirasida O‘zbekiston va Ozarbayjon tadbirkor ayollarining birinchi biznes-forumi bo‘lib o‘tgan. Bu haqda parlament yuqori palatasi matbuot xizmati “Daryo”ga ma’lum qildi.
Forumda O‘zbekiston iqtisodiyotining deyarli barcha tarmoqlari, xususan, sanoat, xizmat ko‘rsatish, qishloq xo‘jaligi, hunarmandchilik kabi sohalarni qamrab olgan O‘zbekiston tadbirkor ayollari delegatsiyasi ishtirok etgan.
Tadbirda so‘zga chiqqan har ikki mamlakat tadbirkor ayollari O‘zbekiston—Ozarbayjonning turli sohalarida tadbirkorlikni rivojlantirish va ularning salohiyatini yuksaltirish borasida tajriba almashish, dolzarb muammolarni muhokama qilish uchun qulay maydonga aylangan ushbu forumning ahamiyati va dolzarbligini ta’kidlagan.
Tadbir so‘ngida Xotin-qizlarning jamiyatdagi rolini oshirish, gender tenglik va oila masalalari bo‘yicha komissiya huzuridagi Tadbirkor ayollar klubi hamda Ozarbayjonda ayollar tadbirkorligini rivojlantirish uyushmasi o‘rtasida ikki tomonlama munosabatlarni rivojlantirish bo‘yicha o‘zaro anglashuv memorandumi imzolangan.
Ikki mamlakat tadbirkor ayollari o‘rtasida “B2B” formatida o‘tkazilgan uchrashuvlar natijasida 54 million dollardan ortiq miqdorda 19 ta shartnoma va memorandumlar imzolangan.
Avvalroq Tanzila Norboyeva Qirg‘iziston prezidenti Sadir Japarov bilan uchrashgani to‘g‘risida xabar berilgandi.
Izoh (0)