“O‘zgidromet” may oyi so‘nggida iyun oyida qanday ob-havo bo‘yicha prognozlarini e’lon qilgandi. Gidrometeorologiya xizmatining ma’lum qilishicha, prognozlar o‘zini oqlagan.
Qayd etilishicha, xizmat markazining joylardagi kuzatuv stansiya ma’lumotlariga ko‘ra, mazkur oy boshidan 21-iyun kuniga qadar Samarqand va Toshkent viloyatlarida yog‘ingarchilik me’yordan ko‘p kuzatilgan. Oy boshidan Toshkent shahrida o‘rtacha oylik yog‘ingarchilikning 130 foizi kuzatilgan. O‘zbekistonning katta qismida esa yog‘ingarchilikning umumiy miqdori o‘rtacha oylik iqlimiy ko‘rsatkichlaridan kam bo‘lgan.
19—20-iyun kunlari respublika hududlariga Qora dengiz va Kavkaz hududlaridan g‘arbiy nam havo massalarining kirib kelishi qayd etilgan. Bu jarayon kuchli shamol va ayrim viloyatlarda kuchli yog‘ingarchiliklar bo‘lishiga olib kelgan. Kuchli yog‘ingarchiliklar respublikaning janubiy va shimoli-sharqiy hududlarida kuzatilgan. Xususan, Toshkent shahrida 20-iyun kunduz kuni vaqti-vaqti bilan kuchli jadal yog‘ingarchilik kuzatilgan. Yog‘ingarchilik umumiy miqdori poytaxtda notekis taqsimlangan.
Ta’kidlanishicha, sutkaning 12 soat ichida 15 mm va undan ko‘p yog‘ingarchilik kuzatilishi bu xavfli meteorologik hodisa hisoblanadi. Ayniqsa, yoz oylarida bu kabi yog‘ingarchilik odatda intensiv (jadal) ko‘rinishda yog‘ishi hisobiga yo‘lsozlik va qurilish obyektlarida noto‘g‘ri yondashuv asosida barpo etilgan obyektlar (lotok, suv o‘tkazish inshootlari, drenaj, kuchli yog‘ingarchilikka bardoshli tom yopilmalari) sel-suv bosish hodisalarini keltirib chiqarishi mumkin.
Yoz oylarida poytaxtda 12 soat ichida 15 mm dan ko‘p yog‘ingarchiliklar kuzatilishi juda kamdan kam holatlarda ro‘y beradi. Toshkent shahrida oxirgi o‘n yillikda yozning dastlabki iyun oyida birgina holatda sutka davomida 15 mm dan ko‘p yog‘ingarchilik kuzatilgan. 2019-yilning iyun oyi boshlarida (3- va 6-iyun) Toshkentda ikki kun ichida umumiy 56 mm yog‘ingarchilik qayd etilgan. Yog‘ingarchiliklar do‘l va kuchli jadal yomg‘ir ko‘rinishida yog‘ib o‘tgan.
Izoh (0)