Oilaviy tadbirkorlikni yo‘lga qo‘yish bo‘yicha davlat tomonidan bir qator imtiyozlar yaratilgan. Ular haqida Markaziy bankning Finlit loyihasi ma’lumot berdi.
Tadbirkorlik – aniq maqsadli va doimiy sa’y-harakatni talab qiluvchi tavakkalchilikka asoslangan hamda daromad topishga qaratilgan faoliyat hisoblanadi.
Tadbirkorlik ko‘nikmasini inobatga olib, bozordagi talabni o‘rgangan holda o‘zi uchun qulay bo‘lgan istiqbolli sohani tanlash, eng kichigidan boshlash, faoliyatni kengaytirishga moyillik, xatarlarni baholay olish tadbirkorlikning muvaffaqiyat kaliti hisoblanadi.
Tadbirkor – hisob-kitobli tavakkalchi, yangilik va rivojlanishga intiluvchi, mustaqil va mas’uliyatli qarorlar qabul qiladigan va ularning oqibati hamda natijasini oldindan ko‘ra oladigan shaxs hisoblanadi.
Tadbirkorlikni oila a’zolari bilan birgalikda boshlash amaliyotda o‘z samarasini ko‘rsatib kelmoqda. Ushbu yo‘nalishda “Har bir oila tadbirkor” davlat dasturi asosida “Agrobank” ATB, “Mikrokreditbank” ATB, “Xalq banki” ATB tomonidan kreditlar ajratilmoqda.
Ushbu dastur doirasida kreditlar oilaviy tadbirkorlikning har qanday turiga (masalan, issiqxona tashkil etish, parrandachilik, xizmat ko‘rsatish, tikuvchilik) shartnomaga asosan pul ko‘chirish yo‘li bilan quyidagi shartlarda ajratiladi:
- jismoniy shaxslarga - bazaviy hisoblash miqdorining 150 baravarigacha miqdorda (36,7 mln so‘mgacha);
- davlat ro‘yxatidan o‘tgan kichik tadbirkorlik subyektlariga - bazaviy hisoblash miqdorining 1000 baravarigacha miqdorda (245,0 mln so‘mgacha).
Kredit 3 yilgacha berilib, 6 oygacha imtiyozli davrni o‘z ichiga oladi. Uning yillik foizi — 14 foiz.
Ular kredit hisobiga amalga oshiriladigan loyihaning biznes-rejasiga muvofiq o‘zini o‘zi qoplash jihatlaridan kelib chiqib 2 yilgacha imtiyozli davr bilan 5 yil muddatgacha ajratilishi mumkin.
Bunda berilayotgan imtiyozli davr va kreditni qaytarish muddati batafsil asoslantirilishi kerak.
Shu bilan birga, kreditlar bog‘dorchilik, uzumchilik va limonchilikni tashkil etish uchun 3 yilgacha imtiyozli davr bilan 7 yilgacha muddatga sektor rahbarlari va tuman Oilaviy tadbirkorlikni qo‘llab-quvvatlash markazining xulosasi asosida berilishi mumkin.
Bugungi kunda oilaviy tadbirkorlikni rivojlantirish dasturlari doirasida kreditlar bo‘yicha arizalarni qabul qilish Yagona elektron platformasi oilakredit.uz ishga tushirilgan.
Ushbu platformada arizalarni yuborish 4 bosqichda amalga oshiriladi:
- Shaxsiy ma’lumotlarni kiritish.
- Qarzdor bilan bog‘lanish uchun ma’lumotlarni kiritish.
- Olinayotgan kredit bo‘yicha ma’lumotlarni kiritish.
- Ariza tartib raqami (ID) raqamini saqlab qo‘yish.
Agar fuqaro dastur doirasida jismoniy shaxslarga ajratiladigan kredit miqdoriga nisbatan ko‘proq kredit olish istagida bo‘lsa, o‘z faoliyatini davlat ro‘yxatidan o‘tkazishi va qo‘shimcha hujjatlar taqdim etishi zarur bo‘ladi.
Avvalroq Markaziy bank pul tejashda odamlar yo‘l qo‘yadigan xatolar haqida ma’lumot bergandi.
Izoh (0)