Сенат алкоголь ва тамаки маҳсулотлари тарқатилиши ҳамда истеъмол қилинишини чеклашга оид қонунни рад этди

Сенатнинг 13 июнь куни бўлиб ўтган ялпи мажлисида «Алкоголь ва тамаки маҳсулотларининг тарқатилишини ҳамда истеъмол қилинишини чеклаш тўғрисида»ги қонун бир қанча асослар сабаб рад этилди. Бу ҳақда «Дарё» мухбири хабар бермоқда.

Мажлисда сенатор Одилжон Эминов қонунни қабул қилишни рад этиш учун асослар келтирди. «Қонунни дастлабки тарзда кўриб чиқиш жараёнида асосий тушунчаларга аниқлик киритиш эҳтиёжи мавжудлиги, давлат органларида такрорловчи ваколатлар, турли ёш тоифасидаги субъектлар белгилангани, киритилаётган чеклов ва тақиқлар доирасида қатор истиснолар, коллизион нормалар мавжуд экани маълум бўлди. Аввало, қонуннинг тўғридан-тўғри таъсир этиш субъектлари айрим моддаларда алкоголь ва тамаки моддаларини истеъмол қилишнинг зарари тўғрисида ахборот тарқатиш, истеъмол қилиш ва жалб қилишга имкон берувчи сабаблар ва шарт-шароитларни бартараф этиш бўйича чора-тадбирларнинг профилактика ишлари фақатгина вояга етмаганлар ўртасида олиб бориш назарда тутилган. Бошқа моддаларда эса истеъмол қилишнинг зарарли таъсиридан ҳимоя қилиш, бундай маҳсулотларни реализация қилиниши ва истеъмол жараёнларига жалб қилинишини тақиқловчи нормалар 21 ёшга тўлмаганлар учун деб белгилаб қўйилмоқда», — деди сенатор.

Маълум қилинишича, қонун доирасида вужудга келадиган муносабатларда (алкоголь ва тамаки маҳсулотларини истеъмол қилиши ва жалб этилишида амалга ошириладиган чора-тадбирлардан) 18 ёшдан юқори ва 21 ёшга тўлмаган шахслар қатлами четда қолиб кетяпти.

«Қонунда субъектларни 18 ёшдан 21 ёшгача ажратиш, нормаларни турлича қўллаш ва талқин қилишга олиб келиши мумкин. Шу боис, ушбу нормаларни қайта кўриб чиқиш мақсадга мувофиқ. Шунингдек, қонунда чекилмайдиган тамаки маҳсулотлари қаторида «носвой» тушунчасининг мазмуни хат бошида алоҳида очиб берилган. Бироқ, бошқа янги турдаги чекилмайдиган тамаки маҳсулотлари мазмуни очиб берилмаган. Уларнинг бир-бирдан фарқлари келтирилмаган. Шу боис, қонуннинг 3–4-моддаларида чекилмайдиган тамаки маҳсулотлари тамакили ва никотинли снус тушунчаларини очиб бериш мақсадга мувофиқ. Кўриб турганингиздек, қонун ишлаб чиқишда аҳоли, айниқса ёшларнинг соғлиғини сақлашдек муҳим мақсад бор. Лекин камчиликлари мавжуд бўлиб, унинг шундайлигича қабул қилиниши мақсадга мувофиқ эмас деб топилди», — деди Одилжон Эминов.

Шундан сўнг, сенаторлар мазкур қонунни рад этишни қўллаб-қуватлаб овоз берди ва қонун рад этилди.