Andijon shahar “Yangi bozor” savdo majmuasida odamlarga navbat bilan arzonlashtirilgan shakar sotish jarayonini tasvirga olishga uringan jurnalistning telefoni tortib olingani haqida xabar berilgandi.
Jurnalist o‘z shaxsiy blogida IIB binosidan chiqqani va telefonini qaytarib olganini ma’lum qildi.
“Ahvolim yaxshi, telefonimni qaytarib oldim. IIV matbuot xizmati rahbari SH.G‘iyosovning bayonotidan farqli ravishda, ayni vaziyatda jabrlanuvchi men ekanligim tasdiqlanib, qo‘yib yuborildim.
Vaziyatga befarq bo‘lmay, zudlik bilan matbuotda yoritgan barcha bloger va jurnalistlarga minnatdorchilik bildiraman.
Barcha jurnalist va blogerlar doimo shunday bir-birlarini qo‘llab-quvvatlashini va qonunlar doimo ishlashini tilab qolaman”, — deb yozgan Javohir Abdullayev.
Aslida nima bo‘lgan edi?
3-iyun soat 09:50 da “Yangi bozor” savdo majmuasida Ilyos ismli Andijon IIB xodimi tomonidan shakar savdosini suratga olayotgan “Human.uz” xodimining xizmat telefoni videoga olish qonunga zid degan iddao bilan kuch ishlatish yo‘li bilan tortib olingan. “Bir qancha urinishlardan so‘ng ham smartfon qaytarib berilmayapti. Yagona sharti – kuch ishlatish yo‘li bilan olingan va IIB xodimining kuch ishlatgani hamda telefonni tortib olgani suratga olingan videoni o‘chirib yuborish ekan”, — deyiladi xabarda.
IIV matbuot kotibi Shohrux G‘iyosovning ma’lum qilishicha, IIB xodimlari fuqarolarning talabidan kelib chiqib, jurnalistdan videoni o‘chirishni so‘ragan.
G‘iyosovga ko‘ra, fuqaro J.Abdullayev odamlarning navbatini va o‘zaro gap talashayotganini tasvirga olish vaqtida, fuqarolar tomonidan ularning yuzlarini tasvirga olishiga e’tiroz bildirilib, huquqlarini poymol qilmasdan tasvirni o‘chirib tashlash talab qilingan.
Jamoat tartibini buzilishini oldini olish maqsadida, bozor hududiga biriktirilgan ichki ishlar organlari xodimi tomonidan fuqaro J.Abdullayevga fuqarolarni roziligisiz ularni tasvirga olmaslik tushuntirilgan.
“Hozirda, shakarga navbatda turgan fuqarolar va J.Abdullayev o‘rtasidagi ziddiyatga oydinlik kiritish maqsadida voqea ishtirokchilari IIBga olib borilgan”, — deyilgan munosabatda.
Oliy Majlis Qonunchilik palatasi deputati Rasul Kusherbayev ham sodir bo‘lgan voqea munosabat bildirib, qonunda jurnalistlarga nisbatan bosim va tahdid taqiqlangan bo‘lsa-da, biroq buning uchun alohida javobgarlik shu kunga qadar belgilanmaganini qayd etdi.
“Jurnalist voqea hodisalarni tasvirga olishda umumiy fondagi fuqarolarning har birining yuzini tasvirga tushishiga ulardan ruxsat olishi qonunda yo‘q. Kimki istamasa, kameradan yuzini burishi mumkin. Yoki video tarqatilishidan oldin jurnalistdan o‘zining yuzini ko‘rsatmaslikni so‘rashi mumkin. Axborot to‘plab, tarqatish jurnalistning professional faoliyati hisoblanadi. Fuqaroning so‘rovi qoniqtirilmagan taqdirda fuqaro bu bo‘yicha fuqarolik sudiga murojaat qilishga haqli.
Ichki ishlar vazirligi vakilining IIB xodimlarining jurnalistdan majburan tasvirga olish uskunasini tortib olgan holatini bu tarzda xaspo‘shlashi absurd va mantiqsiz. Bunday uslub ichki ishlar tizimi obro‘sini oshirmaydi, bil’aks to‘kadi. Balki vazirni shaxsan o‘zlari bunga e’tibor qilishi kerakdir”, — deb yozadi Kusherbayev.
Izoh (0)