Prezident Shavkat Mirziyoyev raisligida qayta tiklanuvchi energiyadan foydalanishni kengaytirish bo‘yicha ustuvor vazifalarga bag‘ishlangan yig‘ilish boshlandi. Bu haqda davlat rahbarining matbuot kotibi xabar berdi.
“Nima uchun ushbu yig‘ilishni o‘zim o‘tkazayapman? ‘Inson qadrini ulug‘lash’ yilida har bir fuqaromizning xonadonida yaxshi yashashiga sharoit yaratishimiz zarur. Bir narsani aniq tushunish kerak. Bir yilda O‘zbekistonda 10 milliard dollarlik elektr va gaz iste’mol qilinadi. Agar buning 10 foizini iqtisod qilishni o‘rgansak, bu 1 milliard dollarni boshqa ehtiyojlar uchun sarflashimiz mumkin.
Hokim va vazirdan tortib, mahalla raisigacha barcha darajadagi rahbarlar bu masalaning qanchalik muhimligini tushunayaptimi, bu borada o‘zining mas’uliyatini his qilayaptimi, degan savollar meni juda qiynaydi.
Qaysi vazir yoki uning o‘rinbosari hisob-kitob qilib, energiya sarfini qisqartirish bo‘yicha tashabbus ko‘rsatdi? Ular o‘zi nima uchun oylik olayapti?”, — deydi davlat rahbari yig‘ilish avvalida.
Shuningdek, yig‘ilishda so‘nggi yillardagi islohotlar natijasida aholining elektr ta’minotidagi uzilishlar ancha qisqargani qayd etilgan. Lekin ta’kidlanishicha, kuz-qish mavsumida aholining gazga bo‘lgan ehtiyoji keskin oshishi sababli barcha yuklama elektr tarmoqlariga tushmoqda.
Ma’lum qilinishicha, hozirgi kunda aholining kamida 2-3 milliard kilovatt soat elektr energiyasiga qo‘shimcha talabi mavjud. Kelgusi besh yilda esa bu ehtiyoj yana 10 milliard kilovatt soatga oshadi. Bunday vaziyatda eng samarali yo‘l – muqobil energiyadan foydalanishni ko‘paytirish ekani, bu borada 2019-yilda alohida jamg‘arma tashkil qilinib, aholiga budjetdan subsidiya berish tizimi joriy etilgani qayd etilgan.
“Lekin birorta viloyat, tuman va shahar hokimida yoki vazirda o‘z tizimidagi tashkilotlarda energiya iste’moli, uni tejash, muqobil energiya uskunalarini o‘rnatish bo‘yicha hisob-kitob yo‘qligi, ular joriy qilingan subsidiya va kompensatsiyadan o‘z tarmog‘i yoki hududida foydalanish bo‘yicha jon kuydirmagani tanqid qilindi”, — deyiladi xabarda.
Avvalroq O‘zbekiston yozda Rog‘un GESdan elektr energiya sotib olishni rejalashtirayotgani haqida xabar berilgan edi.
Izoh (0)