Талабалар шаҳарчасида исёндан кейинги биринчи байрам, нархи бир йилда икки баравар ўсган картошка, Тошкентда ўқувчи-болалар меҳнат биржаси. Ўзбек матбуоти 8 июнда нималар ҳақида ёзган?

Тарих — ҳаёт такрорлардан иборат экани ҳақида сабоқ берувчи энг яхши устоз; ҳар кунлик бу сабоқлардан доим ҳам вақтида ва тўғри хулосалар чиқарилмаса-да, тарих барибир беқиёс устозлигича қолаверади.

Ўзбекистон ва жаҳоннинг бундан 60 ва 30 йил аввалги манзарасига ўзбек матбуоти кўзи билан имкон қадар назар солиш ҳам қизиқ, ҳам фойдали кўринди. Ўн йиллар муқаддам айнан бугунги санада нималар бўлган, давр матбуоти улар ҳақида нима деб ёзган, ушбу воқеа-ҳодисаларга жамоатчиликнинг муносабати қандай эди — бари «Кун матбуоти тарихи» рукни материалларида.

60 йил аввал. 1962 йил 8 июнь, жума

Сенегал бош вазири Мамаду Дианинг Ўзбекистонга ташрифи давомида этмоқда: у бошлиқ делегация бир кун давомида Тошкент тўқимачилик комбинатида, Янгийўл яқинидаги Қишлоқ хўжалигини механизациялаш ва электрлаштириш Ўрта Осиё илмий-тадқиқот институтида, Янгийўлдаги «Ленинизм» колхозида (улар бу ерда, жумладан, колхознинг маданий-маиший муассасалари билан танишган, шу ердаги ўрта мактаб ва касалхонада бўлган), Тошкентдаги Ўрта Осиё ва Қозоғистон мусулмонлари диний назоратида бўлган.

«Наманган тобора кўркамлашмоқда», деб бошланади мухбир Т.Сулаймоновнинг «Меҳнаткашлар учун» сарлавҳали хабари. Хабарда янги хонадонларнинг газлаштирилганига алоҳида урғу берилади.

«1961 йил май ойидан 1962 йил ойигача картошка нархи 2 баравардан зиёд кўтарилди», — дейилади «Қизил Ўзбекистон»да босилган «Англияда нархлар ошмоқда» хабарида.

30 йил аввал. 1992 йил 8 июнь, душанба

Тошкент давлат университети (ҳозирги Ўзбекистон Миллий университети) саройида Тошкент давлат техника университети талабалари иштирокида «Лобар қизлар» кўрик-танлови бўлиб ўтган. «Ушбу тадбиримиз катта аҳамиятга эга бўлди. Чунки январь ойида бўлиб ўтган фожиали воқеалардан сўнг Талабалар шаҳарчасида биринчи марта бундай байрам ўтказиляпти», — дея университет проректори Ёдгор Шодмоновнинг сўзларидан иқтибос келтирмоқда «Тошкент оқшоми» (январдаги талабалар ғалаёни ҳақида аввалроқ Ўзбекистон бош прокурори Бўритош Мустафоев ҳам фикр билдирган эди).

Ўзбекистонда сўнгги йилларда болалар меҳнати тугатилгани катта муваффақият сифатида эътироф этилади. Бундан 30 йил аввал эса мамлакатда қонуний болалар меҳнат биржаси бўлган. «Меҳнатда тобланган болалар келажакда ажойиб инсон бўлиб етишишларига шубҳа қилмаса ҳам бўлади», — дейилади Тошкентдаги болалар меҳнат биржаси фаолиятига бағишланган хабарда.

Дунёда нима гап? Юрий Лужков Москва раҳбарига айланган — у шу билан 2010 йил сентябрида, Россия президенти Дмитрий Медведевнинг «ишончини йўқотгач» лавозимидан озод қилинади.

Ушбу материал ҳуқуқлари муаллифларида сақланган ҳолда эълон қилиш шарти билан «Дарё» интернет-нашрига тақдим этилди