“Barselona” prezidenti jamoada maoshlarning eng yuqori chegarasini 10 million yevro etib belgiladi

“Barselona” prezidenti Xaon Laporta jamoa ichida yangi moliyaviy qoidalarni joriy qilmoqda.

AS nashrining xabariga ko‘ra, “ko‘k-anorranglilar” futbolchilar uchun maoshning eng yuqori chegarasini belgilab qo‘ygan. Bu har bir futbolchi uchun 10 million yevrodan oshmaydi. Hozirda o‘yinchilarga hozirda jami 560 million yevro maosh to‘lanadi.

Yangi chegara tufayli kataloniyaliklar himoyachi Antonio Ryudiger (“Real”ga o‘tdi) va hujumchi Muhammad Saloh (“Liverpul”) uchun kurasha olmadi. Birinchisi yiliga 12 million, ikkinchisi esa 17 million talab qilgan edi.

Bu yangi qoida jamoadagi futbolchilarga ham taalluqli. Maoshi yiliga 10 million yevrodan oshadigan (Xerard Pike, Frenki de Yong va boshqalar) futbolchilardan maoshini 50 foizgacha qisqartirish rejalashtirilgan.

Avvalroq “Barselona” Yevropaning eng ko‘p qarzga ega klublari ro‘yxatida yetakchilik qilayotgani xabar qilingandi. “Ko‘k-anorranglilar” translyatsiya va litsenziya huquqlarining ma’lum miqdorini sotish orqali 700 mln yevro ishlab olmoqchi ekanligi ma’lum bo‘lgandi.

Eslatib o‘tamiz, klub pandemiya vaqtida va undan keyin bir necha bor jamoa a’zolarining maoshlarini qisqartirgan.