«Барселона» президенти жамоада маошларнинг энг юқори чегарасини 10 миллион евро этиб белгилади

«Барселона» президенти Хаон Лапорта жамоа ичида янги молиявий қоидаларни жорий қилмоқда.

AS нашрининг хабарига кўра, «кўк-анорранглилар» футболчилар учун маошнинг энг юқори чегарасини белгилаб қўйган. Бу ҳар бир футболчи учун 10 миллион евродан ошмайди. Ҳозирда ўйинчиларга ҳозирда жами 560 миллион евро маош тўланади.

Янги чегара туфайли каталонияликлар ҳимоячи Антонио Рюдигер («Реал»га ўтди) ва ҳужумчи Муҳаммад Салоҳ («Ливерпуль») учун кураша олмади. Биринчиси йилига 12 миллион, иккинчиси эса 17 миллион талаб қилган эди.

Бу янги қоида жамоадаги футболчиларга ҳам тааллуқли. Маоши йилига 10 миллион евродан ошадиган (Херард Пике, Френки де Йонг ва бошқалар) футболчилардан маошини 50 фоизгача қисқартириш режалаштирилган.

Аввалроқ «Барселона» Европанинг энг кўп қарзга эга клублари рўйхатида етакчилик қилаётгани хабар қилинганди. «Кўк-анорранглилар» трансляция ва лицензия ҳуқуқларининг маълум миқдорини сотиш орқали 700 млн евро ишлаб олмоқчи эканлиги маълум бўлганди.

Эслатиб ўтамиз, клуб пандемия вақтида ва ундан кейин бир неча бор жамоа аъзоларининг маошларини қисқартирган.