Qatarda bo‘lib o‘tadigan Jahon Chempionati oldidan Fransiya terma jamoasining sobiq futbolchisi Zinedin Zidanning JCH—2006 finalida Marko Materatssiga bosh bilan bergan zarbasiga bag‘ishlangan yodgorlik o‘rnatiladi, deya xabar beradi Goal.
Haykalda fransiyalik sobiq futbolchining bosh bilan zarba berish lahzasi tasvirlanadi.
Xuddi shunday haykal avval Qatarda mavjud bo‘lgan, biroq 2013-yilda mahalliy aholini xafa qilishi mumkinligi inobatga olinib, yodgorlik olib tashlangan. Hozirda mamlakat rasmiylari haykal o‘rnini o‘zgartirishni rejalashtirgan holda ushbu qarordan voz kechgan.
Qatar muzeylari raisi al-Mayassa at-Tani qarorni izohlarkan, shunday deydi: “Jamiyatda evolyutsiya jarayonlari kechmoqda. Buni vaqt talab qiladi, avvaliga odamlar biror narsani tanqid qiladi, keyin esa tushunadi va ko‘nikadi. Zidan Qatarning ajoyib do‘sti. Va u arab dunyosida ibratli shaxsdir. San’at, qolgan barcha narsalar kabi, did masalasi. Bizning maqsadimiz — odamlarning imkoniyat darajasini oshirishdir”.
Zidan va Materatssi o‘rtasidagi mazkur ziddiyatli vaziyat 2006-yilgi mundial finalida Fransiya va Italiya terma jamoalari o‘rtasidagi o‘yinning 110-daqiqasida sodir bo‘lgan. O‘sha vaqtda Zidan italiyalik yarim himoyachi tomonidan aytilgan haqoratli so‘zlarga chiday olmay, Materatssining ko‘krak qafasiga boshi bilan zarba bergan. Shundan so‘ng Zidan bu ishi uchun maydondan chetlatiladi, italiyaliklar esa penaltilar seriyasida ustun kelib, Jahon Chempionatining g‘olibiga aylangandi. Ammo Zinedin o‘yinda ko‘rsatgan nojo‘ya harakatiga qaramay turnirning eng yaxshi o‘yinchisi deb topilgan edi.
Izoh (0)