Marhum basketbolchi Kobi Brayant debyut mavsumida, shuningdek, pley-offning ikki o‘yinida kiygan maykasi kimoshdi savdosida 2,73 million dollarga sotildi, deya xabar beradi NBA rasmiy sayti.
25 yillik futbolkani sotgan kishi kabi xaridor ham ismining sir bo‘lib qolishini xohlagan. Auksionga rahbarlik qilgan Devid Koler avvalroq 1996/97-yilgi mavsumda foydalanilgan formaning narxi 3 milliondan 5 million dollargacha bo‘lishini taxmin qilgandi.
G‘olib bu safar Brayantning “Los-Anjeles Leykers” safida “Yuta” va “Sakramento”ga qarshi muntazam chempionat o‘yinida kiygan 8-raqamli maykasini yutib oldi. Shuningdek, Kobi ushbu libosda 8 va 10-may kunlari “Yuta”ga qarshi G‘arbiy Konferensiya yarim finalida ishtirok etgan.
Brayant faoliyati avvalida kiygan yana bir mayka 2021-yilda 3,69 million dollarga sotilgandi. Dastxat tushirilgan sariq mayka basketbol liboslari ichida eng qimmat sotilgani hisoblanadi.
Brayant 2020-yil 26-yanvar kuni 41 yoshida Kaliforniya hududida aviahalokatga uchrab vafot etgan. O‘sha kuni Kobi bilan birga uning 13 yoshli qizi Janna ham halok bo‘lgan.
Izoh (0)